महापालिका रुग्णालयात 'एम्स'च्या धर्तीवर स्वस्त दरात औषधे - JPN NEWS - www.jpnnews.in

Breaking

Home Top Ad

Post Top Ad

21 November 2019

महापालिका रुग्णालयात 'एम्स'च्या धर्तीवर स्वस्त दरात औषधे



मुंबई - दिल्लीतील 'एम्स'च्या धर्तीवर महापालिका रुग्णालयात उपचार घेणाऱ्या रुग्णांना ४० टक्के सवलतीच्या दरात औषधे उपलब्ध करुन दिली जाणार आहेत. यापार्श्वभूमीवर महापालिका रुग्णालयात औषधालये सुरु करण्यात येणार असून अमृतधारा या संस्थेची याकरिता निवड केली आहे, अशी माहिती मुंबईचे महापौर विश्वनाथ महाडेश्वर यांनी दिली.

महापालिकेच्या केईएम, सायन, नायर या तीन प्रमुख रुग्णालयांसह १६ उपनगरीय रुग्णालये असून त्यावर रुग्णांचा मोठा भार आहे. या रुग्णालयांमध्ये राज्यातील कानाकोपऱ्यांतून मुंबईतील चाळी, झोपडपट्टी भागातील गरीब रुग्ण मोठ्या प्रमाणात येत असतात. त्यांची आर्थिक स्थिती बेताची असल्याने उपचारापासून औषधांचा खर्च त्यांना परवडणारा नसतो. त्यामुळे बहुतांश रुग्ण पालिकेच्या रुग्णालयात दाखल होतात. मात्र, उपचार स्वस्त होत असले तरी डॉक्टरांकडून बाहेरील महागड्या दरातील औषधे खरेदी करण्यास सांगितले जाते. महापालिका सभागृहात याचे पडसाद उमटले होते. महापालिका आयुक्तांनी याची दखल घेत, डॉक्टरांना स्वस्त व वेळेत औषधे देण्याचे निर्देश दिले. मात्र, डॉक्टरांकडून अंमलबजावणी केली जात नव्हती. त्यामुळे रुग्णांची परवड कायम होती. प्रशासनाने याला चाप लावण्यासाठी आणि रुग्णांना मदत व्हावी म्हणून सवलतीत औषधे देण्याचा निर्णय घेतला आहे. त्याअनुषंगाने पालिकेच्या सर्वच रुग्णालयात अशी औषधालये सुरु केली जाणार आहेत. बुधवारी याबाबतच्या प्रस्तावाला गटनेत्यांच्या बैठकीत बहुमताने मंजुरी देण्यात आली. या निर्णयामुळे रुग्णांना दिलासा मिळणार आहे.

Post Bottom Ad