फेरीवाल्यांचे १३ डिसेंबरला संसदेसमोर धरणे आंदोलन

3/12/2013 http://jpnnews.webs.com मुंबई : सर्वोच्च न्यायालयाने ९ सप्टेंबर २0१३ रोजी ऐतिहासिक आदेश दिला असला तरी फेरीवाल्यांच्या संदर्भातील राष्ट्रीय धोरणाच्या आधारे नियोजित कायद्याला राज्यसभेची विनाविलंब मंजुरी द्यावी, या मागणीसाठी १३ डिसेंबरला दिवशी दिल्ली येथे संसदेसमोर फेरीवाल्यांचे धरणे आंदोलन आयोजित करण्यात आल्याची माहिती नॅशनल हॉकर्स फेडरेशनचे नेते शरद राव यांनी दिली. नॅशनल हॉकर्स फेडरेशनच्या बॅनरखाली देशातील फेरीवाला संघटनेच्या नेत्याची रविवारी मुंबईत सभा झाली. त्या वेळी या सभेत देशभरातील फेरीवाला संघटनांमधून अध्यक्षपदी शरद राव यांची निवड झाली. या सभेत संपूर्ण देशातील फेरीवाला संघटना त्यांच्या संघटना संलग्न नॅशनल हॉकर्स फेडरेशनशी संलग्न कराव्यात, असे आवाहन करण्यात आल्याचे शरद राव यांनी याबाबत माहिती देताना सांगितले. केंद्राच्या स्टँडिंग कमिटी व अधिवेशनात लोकसभेची मंजुरी दिलेली नाही. त्यामुळे १३ डिसेंबरला संसदेवर धडक देऊन धरणे आंदोलन छेडण्याचा निर्णय घेण्यात आला. या वेळी हजारो फेरीवाले या आंदोलनात सहभागी होतील, असेही राव यांनी स्पष्ट केले.