सैन्यदलात भरती होऊन देशरक्षणाचे स्वप्न उराशी बाळगून अनेक तरुण राष्ट्रीय छात्रसेनेत (एनसीसी) प्रवेश करतात. राजपथवरील संचलनात सहभागी होणे हे त्यादृष्टीने उचललेले पहिले पाऊल असते. पण, त्यासाठीचे खडतर आव्हान पार करण्यात फारच थोडे कॅडेट्स यशस्वी होतात. यंदा मात्र महाराष्ट्राने बाजी मारली असून, ४२ कॅडेट्सचा या संचलनात सहभाग आहे. त्यातही स्नेहा तांबे, श्रीधर पाडेकर आणि रवी रंजन हे तिघांमुळे सिद्धार्थ कॉलेजचा 'झंडा ऊंचा' झाला आहे. रवीने तर नौदल युनिटमध्ये बेस्ट कॅडेट होण्याचा मानही यंदा पटकावला आहे.
राजपथ आणि सिद्धार्थ कॉलेज यांचे नाते कायमच अतूट राहिले आहे. संरक्षण दलात अनेक अधिकारी देणाऱ्या या कॉलेजने गेल्या काही वर्षात २३हून अधिक कॅडेट्स राजपथावर चमकले आहेत. याच पंक्तीत यंदा नौदल युनिटमध्ये स्नेहा, रवी आणि श्रीधर यांची भर पडली आहे. देशातील दीड हजारांहून अधिक कॉलेजांमधून एकाच कॉलेजचे तीन कॅडेट्स राजपथावरील संचलानासाठी निवडले जाणे हे देखील तितकेच अभिमानास्पद आहे.
तुटपुंज्या पगारावर वडील घराचा रहाटगाडा हाकत असले, तरी श्रीधरने संरक्षण दलात अधिकारी होऊन त्यांच्या या श्रमाचे चीज करण्याचे ध्येय बाळगले आहे. तर नौदलात वैमानिक विभागात काम करण्याचे एकच ध्येय स्नेहाच्या समोर आहे. नौदल बेस्ट कॅडेटचा मान मिळणाऱ्या रवीला इंडियन मिलिटरी अकॅडमी आताच खुणावू लागली आहे. सैन्यदलात अधिकारी म्हणून भरती होऊन देशसेवा करण्याच्या आमच्या आत्मविश्वासाला राजपथावरील संचलनाने बळ दिले आहे. आता आम्हाला आमच्या स्वप्नपूर्तीपासून कोणीच रोखू शकत नाही, असा विश्वास तिघांनीही व्यक्त केला. सिद्धार्थच्या एनसीसीची धुरा सांभाळत अनेक कॅडेट्सना घडवणाऱ्या ले. कमांडर सुनील कांबळे यांनी सारे श्रेय विद्यार्थ्यांच्या मेहनतीला आणि कॉलेजच्या पाठिंब्याला दिले आहे.
No comments:
Post a Comment