मुंबई विद्यापीठाचे कुलगुरू एलएलबी परीक्षेत चक्क नापास

मुंबई - विद्यापीठाचे कुलगुरु डॉ संजय वसंत देशमुख एलएलबी परीक्षेत नापास झाले असल्याची धक्कादायक कबुलीच आरटीआय कार्यकर्ते अनिल गलगली यांना मुंबई विद्यापीठाने दिली आहे.  





आरटीआय कार्यकर्ते अनिल गलगली यांनी १८ सप्टेंबरला मुंबई विद्यापीठाच्या परिक्षा निकाल कक्ष, नावनोंदणी विभाग आणि पुनर्मुल्यांकन कक्षाकडे मुंबई विद्यापीठाचे कुलगुरु डॉ संजय वसंत देशमुख यांनी दिलेली एलएलबी परीक्षा आणि निकालाबाबत माहिती विचारली होती. मुंबई विद्यापीठाच्या परीक्षा निकाल कक्षाचे उपकुलसचिव यांनी गलगली यांना कळविले की, संजय वसंत देशमुख यांनी एलएलबी या पदवी शिक्षणक्रमाच्या सत्र-१ च्या ऑक्टोबर / नोव्हेंबर, २०१४ मध्ये घेतलेल्या परिक्षेसाठी अर्ज दाखल केला होता. मात्र ते परीक्षेस प्रविष्ठ झाले नाहीत. तसेच ते या शिक्षणक्रमाच्या सत्र-२ च्या एप्रिल/मे, २०१५ मध्ये घेतलेल्या परीक्षेस प्रविष्ठ होऊन अनुउत्तीर्ण झालेले आहे.

कायम नाव नोंदणी प्रलंबित
मुंबई विद्यापीठाच्या कोणत्याही परीक्षेसाठी विद्यार्थ्यांकडे परीक्षेस बसताना कायम नावनोंदणी क्रमांक असणे आवश्यक असते. मात्र कुलगुरु झालेले डॉ संजय देशमुख यांच्याकडे अशा प्रकारचा कायम नावनोंदणी क्रमांक नसल्याची कबूली नावनोंदणी विभागाने गलगली यांना दिली.
मुंबई विद्यापीठाच्या नावनोंदणी विभागाचे उपकुलसचिव यांनी गलगली यांना कळविले की, संजय वसंत देशमुख यांचा कायम नावनोंदणी प्रलंबित असल्याने नावनोंदणी क्रमांक पुरवू शकत नाही. अलिबाग येथील एड दत्ता पाटील कॉलेज ऑफ लॉमधील विद्यार्थी असलेले संजय वसंत देशमुख यांची पात्रता प्रलंबित असल्यामुळेच त्यांस कायम नावनोंदणी क्रमांक जारी केला नाही. कायम नावनोंदणी क्रमांक जारी होत नाही तोपर्यंत परीक्षेस बसण्यास दिले जात नाही आणि परीक्षेस बसला तर अशी विद्यार्थ्यांचा निकाल जाहीर केला जात नाही. मात्र गलगली यांनी आरोप केला की कुलगुरु असल्यामुळेच नियम बाजूला सारत निकाल जाहीर केला गेला आहे.

पुनर्मुल्यांकनासाठी अर्ज केला नाही
एलएलबी या शिक्षणक्रमाच्या सत्र-२ च्या एप्रिल/मे, २०१५ मध्ये घेतलेल्या परीक्षेस प्रविष्ठ होऊन अनुउत्तीर्ण झाल्यानंतर संजय वसंत देशमुख यांनी पुनर्मुल्यांकनासाठी अर्ज केला नसल्याची माहिती अनिल गलगली यांस मुंबई विद्यापीठाच्या पुनर्मुल्यांकन कक्षाच्या उपकुलसचिव यांनी दिली आहे.

गलगली यांनी मुंबई विद्यापीठाचे कुलगुरु देशमुख एलएलबी परीक्षेत अनुउत्तीर्ण झाल्याची बाब गंभीर असल्याचे सांगत सर्च कमिटीने कोणत्या आधारावर आणि गुणवत्तेवर देशमुखाची मुंबई विद्यापीठाच्या कुलगुरु पदावर वर्णी लावली आहे? असा सवाल करत अनिल गलगली यांनी मुंबई विद्यापीठाचे कुलपति असलेल्या राज्याचे राज्यपाल यांस पत्र पाठवित मुंबई विद्यापीठाची इभ्रत वाचविण्याचे साकडे घातले आहे.