महापालिका निवडणूकीत अनुसूचित जातीसाठी १५ प्रभाग राखीव

गेल्या दोन निवडणुकीपेक्षा ४ प्रभाग वाढले 
मुंबई / अजेयकुमार जाधव - 28 Sep 2016
मुंबई महानगरपालिकेची निवडणूक फेब्रुवारी २०१७ मध्ये होत आहे. मुंबई शहरातील लोकसंख्या कमी झाल्याने आणि मुंबई उपनगरची लोकसंख्या वाढल्याने प्रभाग रचना बदलण्यात आली आहे. ५४ ते ५५ हजार नागरिकांसाठी एक नगरसेवक असणार आहे. सध्या अनेक प्रभाग रेल्वेमार्गाच्या दोन्ही बाजूला पूर्व व पश्‍चिम असे विस्तारलेले आहेत. नव्या रचनेत प्रभाग रेल्वेमार्गाच्या अलीकडे किंवा पलीकडे ठेवण्यात आले आहेत. महापालिकेच्या सन २०१७ च्या निवडणुकीमध्ये अनुसूचित जातीची लोकसंख्या वाढल्याने २२७ पैकी १५ प्रभाग आरक्षित ठेवण्यात आले आहेत. सन २००७ व २०१२ च्या निवडणुकींमध्ये फक्त ११ प्रभाग राखीव होते. त्यात ४ प्रभागांची वाढ झाली आहे.

महापालिकेने सन २००७ व २०१२ च्या निवडणुकीमध्ये अनुसूचित जातीसाठी २२ प्रभागांची यादी बनवण्यात आली होती. त्यापैकी ११ प्रभाग निवडणुकीमध्ये आलटून पालटून राखीव ठेवण्यात आले होते. सन २०१७ च्या निवडणुकीसाठी महापालिकेने अनुसूचित जातीची लोकसंख्या जास्त असलेले तब्बल ६० प्रभागांची यादी निवडणूक आयोगाला सादर केली होती त्यापैकी १५ प्रभाग राखीव ठेवण्यात आले आहेत. त्याला २३ सप्टेंबरला निवडणूक आयोगाने मान्यता दिली असून ३ ऑक्टोबरला आरक्षणाच्या सोडतीवेळी जाहीर केले जाणार आहे. याच सोडती दरम्यान या १५ प्रभागापैकी महिलांसाठी (५० टक्के आरक्षण) कोणते ८ प्रभाग राखीव असतील हे स्पष्ट होणार आहे.

महापालिकेने केलेल्या नव्या प्रभाग रचनेप्रमाणे एम पश्चिम विभागातील जुन्या १४३,१४४,१४६ प्रभागामधून बनवण्यात आलेला नवा प्रभाग क्रमांक १५२, एम पश्चिम विभागातील जुन्या १४२,१४३ प्रभागामधून बनवण्यात आलेला नवा प्रभाग क्रमांक १५५, एच पूर्व विभागातील जुन्या ८८, ८९ प्रभागामधून बनवण्यात आलेला नवा प्रभाग क्रमांक ९३, जी दक्षिण विभागातील जुन्या १८६,१९०, १९१ प्रभागामधून बनवण्यात आलेला नवा प्रभाग क्रमांक १९५, एल विभागातील जुन्या १६०, १६२, १६३ प्रभागामधून बनवण्यात आलेला नवा प्रभाग क्रमांक १६९. एफ दक्षिण विभागातील जुन्या १९५,१९६ प्रभागामधून बनवण्यात आलेला नवा प्रभाग क्रमांक २००, आर दक्षिण विभागातील जुन्या २५,२६ प्रभागामधून बनवण्यात आलेला नवा प्रभाग क्रमांक २६, ए विभागातील जुन्या २२४, २२५ प्रभागामधून बनवण्यात आलेला नवा प्रभाग क्रमांक २२५, 

एफ उत्तर विभागातील जुन्या १६५,१६६ प्रभागामधून बनवण्यात आलेला नवा प्रभाग क्रमांक १७३, एम पूर्व विभागातील जुन्या १३४,१३९ प्रभागामधून बनवण्यात आलेला नवा प्रभाग क्रमांक १४२, एम पूर्व विभागातील जुन्या १२९,१३८ प्रभागामधून बनवण्यात आलेला नवा प्रभाग क्रमांक १३९, जी उत्तर विभागातील जुन्या १७८,१७९ प्रभागामधून बनवण्यात आलेला नवा प्रभाग क्रमांक १८८, जी दक्षिण विभागातील जुन्या १९१, १९४ प्रभागामधून बनवण्यात आलेला नवा प्रभाग क्रमांक १९८, ई विभागातील जुन्या २०२,२०६,२०७,२०८ प्रभागामधून बनवण्यात आलेला नवा प्रभाग क्रमांक २१०, एम पश्चिम विभागातील जुन्या १४२,१४३,१४४ प्रभागामधून बनवण्यात आलेला नवा प्रभाग क्रमांक १५४ असे १५ प्रभाग अनुसूचित जातीसाठी राखीव ठेवण्यात आले आहेत.

अनुसूचित जातीसाठी राखीव १५ प्रभाग / मतदार 

जुना प्रभाग         नवा प्रभाग    अनु. जातीचे मतदार 

143,144,146            152              11859 

142,143                   155              11551

88,89                        93               10462

186,190,191            195                7820

160,162,163            169                7637

195,196                   200                7626 

25,26                        26                 6990 

224,225                   225                6735 

165,166                   173                6339 

134,139                   142                6286

129,138                   139                6266 

178,179                   188                6123

191,194                   198                5992

202,206,207,208     210                5878

142,143,144            154                5856