उपमुख्यमंत्री अजित पवार यांनी उचललेलं राजीनाम्याचं पाऊल योग्यच असून सिंचन प्रकल्पासंबंधी वस्तुस्थिती जनतेसमोर मांडण्यासाठी राज्य सरकारने आता श्र्वेतपत्रिका जरुर काढावी अशी प्रतिक्रिया राष्ट्रवादी कॉंग्रेसचे अध्यक्ष, केंद्रीय कृषीमंत्री शरद पवार यांनी एका न्यूज चॅनेलसोबत बोलताना व्यक्त केली.
'राज्य सरकार सिंचन प्रकल्पासंबंधी श्र्वेतपत्रिका काढण्याचा विचार करतेय. अशावेळी मी पदावर राहणे योग्य नाही, असं सांगत अजितने राजीनामा देण्यापूर्वी माझ्याशी संपर्क साधला होता. याविषयी थोडा विचार करून तुला कळवतो असं मी त्याला सांगितलं. त्याचा मला परत फोन आला. नंतर पक्षाध्यक्ष म्हणून मी त्याला राजीनामा देण्यास संमती दिली. अजितचा राजीनाम्याचा निर्णय योग्य आहे. पक्षाचा त्याला पाठिंबा आहे. आता सिंचन प्रकल्पासंबंधी वस्तूस्थिती जनतेसमोर मांडण्यासाठी राज्य सरकारने श्र्वेतपत्रिका जरुर काढावी.' असं शरद पवार यांनी सांगितलं.
सरकारचा पाठिंबा काढणार नाहीः शरद पवार
अजित पवार यांच्या राजीनाम्यानंतर राष्ट्रवादी कॉंग्रेसने राज्यातील आघाडी सरकारमधून बाहेर पडून कॉंग्रेसला बाहेरून पाठिंबा देण्याची काही आमदारांकडून मागणी होत आहे. यासंबंधी विचारलेल्या प्रश्नावर उत्तर देताना शरद पवार म्हणाले, 'राज्यात राजकीय अस्थिरता निर्माण करण्याचा आमचा कोणताही इरादा नाही. अशाप्रकारची वक्तव्ये ज्याने कुणी केली असेल त्यांना तसं बोलण्याचा अधिकार आहे.' असं पवार यांनी स्पष्ट केलं.
No comments:
Post a Comment