मनसेचे घाटकोपर पश्चिम येथील आमदार राम कदम यांच्या घरात रविवारी (२० एप्रिल) गौतम बुद्धांच्या अस्थी दर्शनासाठी ठेवण्यात आल्या होत्या. त्या अस्थी बुद्धांच्या नसल्याचा दावा करीत भारिप बहुजन महासंघाचे कार्यकर्ते कदम यांच्या घराबाहेर जमले. यावरून मनसेचे कार्यकर्ते आणि महासंघाच्या कार्यकर्त्यांत बाचाबाची होऊन भारिपच्या कार्यकर्त्यांना मारहाण करण्यात आली.यात महासंघाचे रूपेश लांडगे, रवींद्र मोरे व रोहित तांबे जखमी झाले. हे कार्यकर्ते पार्कसाईट पोलिस ठाण्यात तक्रार नोंदवण्यासाठी गेले असता, पोलिसांनीच त्यांना मनसेच्या कार्यकर्त्यांच्या ताब्यात दिले, असा आरोप भारिपने केला. भारिपच्या कार्यकर्त्यांना मारहाण झाली असली तरी असा कोणताही प्रकार घडलेला नाही, असे वरिष्ठ पोलिस निरीक्षक सकपाळ यांनी सांगितले आहे.
