बोरीवलीतील भाजपचे आमदार आणि लोकसभा निवडणुकीत उत्तर मुंबई मतदारसंघातील उमेदवार गोपाळ शेट्टी यांच्यावर बोरीवली पोलिस ठाण्यात फसवणुकीचा गुन्हा दाखल करण्यात आला आहे. शेट्टी यांच्याबरोबरच भूमापन अधिकारी, उपनिबंधक अशा सात जणांवरही हा ठपका ठेवण्यात आला आहे.
बोरीवलीत राहणाऱ्या रिटा दादरकर यांच्या पतीच्या नावावर असलेली जमीन सरकारी अधिकारी आणि अन्य काहींच्या मदतीने आपल्या नावावर केल्याचा शेट्टी यांच्यावर आरोप होता. दादरकर यांच्याकडील जमीन खोटी कागदपत्रे सादर करून हडप केल्याची आणि त्यांना ठार मारण्याची धमकीही दिल्याची तक्रार करण्यात येत होती. दादरकर यांनी बोरीवली कोर्टात धाव घेतल्यानंतर कोर्टाने पोलिसांना गुन्हा दाखल करण्यास सांगून ९० दिवसांच्या आत आरोपपत्र दाखल करण्यास सांगितले होते. त्यानुसार कार्यवाही करत बोरीवली पोलिसांनी गुरुवारी शेट्टी यांच्यासह सुषमा देवधर, सुरेंद्र पांडे, भूमापन अधिकारी, उपनिबंधक, लालजीभाई सोलंकी, मिश्रा अशा सातजणांवर फसवणुकीचा गुन्हा दाखल केला आहे.
