भारतरत्न डॉ. बाबासाहेब आंबेडकर यांच्या ६० व्या महापरिनिर्वाण दिनानिमित्त बृहन्मुंबई महानगरपालिकेने प्रतिवर्षीप्रमाणे यावर्षीही नागरी सेवा-सुविधा पुरविण्यात वाढ केली असून दादर येथील चैत्यभूमी व शिवाजी पार्क परिसरात पुरविण्यात येणाऱया सेवा-सुविधांबाबत प्रशासन सतर्क व सुसज्ज असल्याचे प्रतिपादन अतिरिक्त महापालिका आयुक्त (शहर) डॉ. पल्लवी दराडे यांनी केले.
अतिरिक्त महापालिका आयुक्त (शहर) डॉ. पल्लवी दराडे यांच्या प्रमुख उपस्थितीत काल (दिनांक ५ नोव्हेंबर, २०१६) महापालिका मुख्यालयातील समिती सभागृहात महापालिकेच्या विविध विभागांचे प्रमुख, एमएमआरडिए, पोलिस प्रशासन, बेस्ट, आपत्ती व्यवस्थापन, मुंबई अग्निशमन दल तसेच विविध सामाजिक संघटना यांच्या पदाधिकाऱयांची बैठक आयोजित करण्यात आली होती, त्यावेळी डॉ. दराडे आढावा बैठकीत बोलत होत्या. यावेळी उप आयुक्त (परिमंडळ - २) आनंद वागराळकर, ‘जी/उत्तर’ विभागाचे सहाय्यक आयुक्त रमाकांत बिरादार, सहाय्यक पोलिस आयुक्त देशमुख व इतर संबंधित संस्थांचे पदाधिकारी उपस्थित होते.
अतिरिक्त महापालिका आयुक्त (शहर) डॉ. पल्लवी दराडे म्हणाल्या की, भारतरत्न डॉ. बाबासाहेब आंबेडकर यांच्या ६० व्या महापरिनिर्वाण दिनानिमित्त प्रतिवर्षीप्रमाणे यावर्षीही चैत्यभूमी येथे येणाऱया अनुयायांकरीता पुरविण्यात येणाऱया नागरी सेवा-सुविधा बृहन्मुंबई महानगरपालिका मागील दोन वर्षांपासून ज्याप्रकारे उत्तमोत्तम देत आहे, त्याचप्रमाणे यावर्षीही उत्तम सेवा-सुविधा पुरविणार असल्याचे सांगितले. विविध संबंधित संस्थांचे पदाधिकारी यांनी प्रशासनाला दिलेल्या सुचनांची पडताळणी करुन त्या अंमलात आणण्यासाठी त्याबाबत कार्यवाही करण्यात येणार असल्याचेही डॉ. दराडे यावेळी म्हणाल्या. शिवाजी पार्क परिसरात स्वच्छतेच्या अनुषंगाने विशेष व्यवस्था करण्यात आली आहे. यामध्ये वेगवेगळया ठिकाणी फिरती शौचालये, रांगेत उभे असणाऱया अनुयायांसाठी फिरती शौचालये, चैत्यभूमी येथे दर्शनासाठी उभ्या असणाऱया अनुयायांसाठी उन्हापासूनच्या संरक्षणासाठी छत, पाण्याची व्यवस्था, बसण्यासाठी बाकडे याही सुविधा पुरविण्याबाबत प्रशासनातर्फे तयारी सुरु आहे. तसेच भोजनदान करणाऱया संस्थांसाठी नियमावली बनविण्यात येणार आहे, जेणेकरुन शिवाजी पार्क परिसरात कोणतीही दुर्घटना घडणार नाही. स्वच्छतेच्या अनुषंगाने सुमारे ८०० कर्मचाऱयांची व्यवस्था करण्यात आली आहे. हे कर्मचारी तीन पाळ्यांमध्ये काम पाहतील. कर्मचाऱयांवर ताण पडू नये यांसाठी सफाई कर्मचाऱयांची कामाची वेळ आठ तासांवरुन सहा तास करण्यात आली आहे. समुद्रकिनारी बोटी तैनात ठेवणे, चैत्यभूमी, शिवाजी पार्क परिसरासोबत राजगृह, डॉ. बाबासाहेब आंबेडकर महाविद्यालय याठिकाणीही आवश्यक त्या सेवा-सुविधा उपलब्ध करुन देण्याचे निर्देशही डॉ. दराडे यांनी संबंधित अधिकाऱयांना दिले आहेत.
डॉ. बाबासाहेब आंबेडकर यांच्या ६० व्या महापरिनिर्वाण दिनानिमित्त १ लाख २५ हजार चौरस फूट मंडपाची व्यवस्था, वंदनीय भंतेजी यांच्यासाठी निवासाची व्यवस्था, शिवाजी पार्क, दादर स्थानक, चैत्यभूमी परिसरात ७ माहिती कक्ष / निरीक्षण मनोरे, रुग्णवाहिकेसहीत सुसज्ज आरोग्य सेवा, अनुयायांसाठी ५० क्लोज सर्कीट, फिरते कॅमेरे, दूरचित्रवाहिनी, ४४ मेटल डिटेक्टर, ८ बॅग स्कॅनर, ६० हॅण्डहेल्ड मेटल डिटेक्टर, विद्युत व्यवस्था (३५० टयुबलाईटस्, २३० हॅलोजन, ५० पेडेस्टंट फॅन), १०० डिलक्स व ३५० प्लास्टीक खुर्च्या, ३०० लाकडी मेज (टेबल), ध्वनिक्षेपण व्यवस्था, ३०० चार्जिंग पॉईंटस्, २०० फिरती शौचालये, २०० स्नानगृह, २ अग्निशमन इंजिन, अतिदक्षता रुग्णवाहिका, ४ बोटी व जलसुरक्षा, शिवाजी पार्क येथे ४६९ स्टॉल्सची रचना, पिण्याच्या पाण्याच्या ३२० नळांची व्यवस्था, १५ टँकर्स, चैत्यभूमी, शिवाजी पार्क परिसरात फ्लेक्स बॅनर्स, होर्डिंग्ज व दिशादर्शक फलक, १४ हजार चौ.मी. वर धूळप्रतिबंधक आच्छादक, २६० न्हाणीघरांमध्ये शॉवरची व्यवस्था, बसण्यासाठी ५० बाकडे या सुविधांचा प्रामुख्याने यामध्ये समावेश आहे.
