मुंबई । प्रतिनिधी 21 Nov 2017 -
एल्फिन्स्टन दुर्घटनेनंतर पश्चिम रेल्वेने प्रवाशांच्या सुरक्षिततेसाठी विविध उपाय योजना राबवण्यास सुरुवात केली आहे. रेल्वे प्रवाशांमध्ये जनजागृती करण्यासाठी पश्चिम रेल्वेवरील स्थानकांच्या पाय-यांवर विविध स्टीकर चिटकवण्यात आले आहेत. मात्र, स्टिकरवरील मराठी भाषा पाहता रेल्वेने ‘मराठीची वाट लावली’ अशी प्रतिक्रिया प्रवाशांकडून व्यक्त केली जात आहे.
एल्फिन्स्टन दुर्घटनेनंतर बांधकामाधीन आणि सुस्थितीत असलेल्या पादचारी पूलांच्या पाय-यांवर स्टिकर चिटकवण्याचा निर्णय घेण्यात आला. त्यानुसार मराठी, हिंदी आणि इंग्रजी भाषेत संदेश देणारे स्टिकर चिटकवण्यात आले आहेत. यामध्ये ‘कृपया रांगेत चालावे’, ‘ढकला ढकल करु नये’, ‘स्वच्छता ईश्वर का घर है,’ अशा आशयांचे स्टिकर लावण्यात आले आहेत. असेच स्टिकर पश्चिम रेल्वेच्या गोरेगाव आणि सांताक्रुझ स्थानकातील पादचारी पूलांच्या पाय-यांवरही लावण्यात आले. ‘कृपया लहान चेंडू घेऊ नका’, ‘कृपया एकतर बाजूला ठेवा’, ‘कृपया हँड्राईल धरुन ठेवा’, ‘कृपया एक पाऊल वगळू नका’ असा संदेश देणारे स्टिकर लावण्यात आले आहेत. यामुळे प्रवासी जागरुकतेसाठी चिटकवण्यात आलेले स्टिकर सध्या प्रवाशांची चान्गलीच करमणूक करत आहेत. पायऱ्यांवरून चढणारे प्रवासी मराठी भाषेत लावलेले हे स्टिकर पाहून रेल्वेच्या मराठी भाषेच्या अज्ञानाबाबत चर्चा करत आहेत. यामधून पश्चिम रेल्वेचे हसे होत आहे. याबाबत अधिक माहिती घेतली असता जनजागृतीसाठी बनवण्यात आलेल्या इंग्रजी संदेशाचे मराठीमध्ये भाषांतर करण्यासाठी गुगल ट्रान्सलेटरचा वापर करण्यात आल्याने हा घोळ झाल्याची माहिती समोर आली आहे.
