मुंबई - दीपावलीच्या पूर्वसंध्येला करण्यात आलेली साफसफाई, भेटवस्तूंची देवाणघेवाण आणि फटाक्यांच्या कचर्यामुळे मुंबईत दैनंदिन कचऱ्याचे प्रमाण प्रचंड वाढले आहे. या सणाच्या काळात तब्बल ३,००० टन अतिरिक्त कचरा निर्माण झाला आहे. या वाढलेल्या कचऱ्याचा प्रभावीपणे सामना करत, मुंबई महानगरपालिकेने (BMC) शहर आणि उपनगर परिसरात वेळेत व सुरळीत साफसफाई सुनिश्चित केली आहे.
बीएमसीची तत्परता -
सप्टेंबर २०२५ पर्यंत शहरातील दररोज सरासरी कचरा निपटारा ६,९०० टन इतका होता. मात्र, सणासुदीच्या काळात हा आकडा वाढून ७,३०० टन प्रतिदिन झाला आहे. म्हणजे दररोज सुमारे ६०० ते ७०० टनांची वाढ झाली. महापालिकेच्या म्हणण्यानुसार, गेल्या काही दिवसांत निर्माण झालेल्या ३,००० टन अतिरिक्त कचऱ्यापैकी २,०७५ टन कचरा कांजूर आणि देवोनार डेपो येथे निपटारा करण्यात आला तर उर्वरित १,००० टन कचरा ट्रान्स्फर स्टेशनवरून उचलण्याचे काम युद्धपातळीवर सुरू आहे.
सफाई पथकांचे अतिरिक्त शिफ्टमध्ये काम -
सणांच्या काळात शहरातील सर्व वॉर्डांमधील बीएमसीच्या सफाई पथकांनी अतिरिक्त शिफ्टमध्ये काम करून रस्त्यांवरील आणि संकलन केंद्रांवरील कचरा त्वरित उचलला आहे. यामुळे सणासुदीच्या गर्दीतसुद्धा शहर आणि उपनगर परिसर स्वच्छ ठेवण्यात यश आले आहे.
“साफसफाई आमच्या सज्जतेचे प्रतिक”-
बीएमसीचे उपयुक्त (घनकचरा व्यवस्थापन) किरण दिघावकर यांनी सांगितले की “सणासुदीच्या काळात अवघ्या काही दिवसांत ३,००० टनांहून अधिक कचरा निर्माण झाला. बीएमसीच्या सर्व पथकांनी दिवस-रात्र काम करून हा अतिरिक्त कचरा वेळेत हाताळला. वेळेत केली गेलेली ही साफसफाई आमच्या सज्जतेचे आणि कर्मचाऱ्यांच्या समर्पणाचे प्रतिक आहे.”
मुख्य मुद्दे -
* दीपावलीदरम्यान मुंबईत ३,००० टन अतिरिक्त कचरा निर्माण
* बीएमसीने कचऱ्याचा वेळेत निपटारा करून स्वच्छता राखली
* २,०७५ टन कचरा डेपोवर, तर १,००० टन ट्रान्स्फर स्टेशनवर हाताळला जातोय
* दररोजच्या कचऱ्याचे प्रमाण ६,९०० टनांवरून ७,३०० टनांपर्यंत वाढले
* सफाई पथके अतिरिक्त शिफ्टमध्ये कामावर
कोणत्याही टिप्पण्या नाहीत:
टिप्पणी पोस्ट करा