मुंबईचा श्वास गुदमरतोय, पण बीएमसी झोपेत आहे - रवी राजा

मुंबई - मुंबईत सलग दुसऱ्या हिवाळ्यात हवेची गुणवत्ता अत्यंत धोकादायक पातळीवर गेल्याने वायूप्रदूषणाचा प्रश्न पुन्हा एकदा ऐरणीवर आला आहे. माजी विरोधी पक्षनेते रवी राजा यांनी या पार्श्वभूमीवर मुंबई महानगरपालिकेवर (बीएमसी) तीव्र टीका केली आहे.

रवी राजा यांनी सोशल मीडियावरून ट्विट करत म्हटलं आहे की, “गेल्या दोन हिवाळ्यांपासून मुंबई विषारी हवा श्वासात घेत आहे. हवेतील AQI (Air Quality Index) अनेक दिवस ‘गंभीर’ पातळीवर होता, तरीही बीएमसीने २८ ऑक्टोबर २०२५ पर्यंत कोणतीही ठोस कारवाई केली नाही. जूनमध्येच ६०० हून अधिक बांधकाम प्रकल्पांना सेन्सर-आधारित एअर मॉनिटर लावण्याचे निर्देश दिले होते, परंतु केवळ ४४ टक्के प्रकल्पांनीच त्याचे पालन केले.”

रवी राजा यांनी या परिस्थितीला ‘निष्काळजीपण नव्हे, तर स्पष्ट विरोध’ असे संबोधले आहे. “बांधकाम व्यावसायिकांना बीएमसीच्या नोटीसांची भीती राहिलेली नाही, कारण कारवाई नेहमी उशिरा, अर्धवट किंवा विसरली जाते,” असा गंभीर आरोप त्यांनी केला.

ते पुढे म्हणाले, “सार्वजनिक आरोग्य बांधकाम व्यावसायिकांच्या हितासाठी बळी देता येणार नाही. जीव धोक्यात असताना बीएमसीकडून दिल्या जाणाऱ्या ‘एक महिन्याच्या मुदती’ म्हणजे विनोद आहे. बीएमसीने तातडीने दंड व वर्क-स्टॉप आदेश लागू करावेत, मंजुरी निलंबित कराव्यात आणि जबाबदारी निश्चित करावी.” 

“मुंबईची हवा थांबून राहू शकत नाही. बीएमसी जर खरंच गंभीर असेल, तर आता इशारे नव्हे — ठोस कृती हवी,” अशा शब्दांत त्यांनी इशारा दिला.

या ट्विटसोबत त्यांनी #MumbaiAQI आणि #BMCAirPollution हे हॅशटॅग वापरून नागरिकांनाही या गंभीर समस्येबाबत जागरूक राहण्याचे आवाहन केले आहे. 

हवेच्या गुणवत्तेचा निर्देशांक (AQI) ऑक्टोबर महिन्यात अनेक दिवस ३०० च्या वर गेला होता, जो ‘गंभीर’ श्रेणीत गणला जातो. तज्ज्ञांच्या मते, मुंबईतील बांधकाम, रस्त्यावरील धूळ, आणि वाहन उत्सर्जन हे प्रदूषणाचे प्रमुख घटक आहेत.