बक्षिसासाठी पोलिसांकडून गरीब, दलित व आदिवासींवर अन्यायच होणार - सुरेश खोपडे

मुंबई - गुन्हे कमी ठेवण्यात यश मिळविल्याबद्दल पोलीस ठाण्याला दिल्या जाणार्‍या बक्षिसाला विरोध करून गुन्ह्यांची विशिष्ट टक्केवारी कमी ठेवल्यावर बक्षीस मिळते म्हणून पोलीस गुन्हेच नोंदविणार नाहीत, अशी भीती निवृत्त आयपीएस अधिकारी सुरेश खोपडे यांनी व्यक्त केली आहे. या प्रकारामुळे गोरगरीब, दलित व आदिवासींवर अन्यायच होणार असल्याचे सांगत तंटामुक्ती हे नाव बदलून ‘तंटानिर्मूलन’ असे ठेवावे, अशी सूचनाही त्यांनी पत्रकार परिषदेत केली.

राज्यात सामाजिक सलोखा कायम टिकविण्यासाठी ‘मोहल्ला कमिटी’च्या धर्तीवर ‘कम्युनिटी पोलिसिंग प्रयोग’ आणि ‘कामसुधार मंडळा’ची स्थापना करावी. महिनाभरात या शिफारसींचा विचार केला नाही तर राज्याचे पोलीस महासंचालक आणि अतिरिक्त मुख्य सचिव (गृह) यांना जाब विचारला जाईल, असा इशारा सुरेश खोपडे यांनी दिला. पोलीस दलाचे सक्षमीकरण व्हावे आणि राज्यातील धार्मिक व जातीय सलोखा कायम रहावा याकरिता गृहमंत्री आर.आर. पाटील, पोलीस महासंचालक आणि गृहसचिवांना शिफारसवजा आराखडा दिला आहे. त्याची सरकारने अंमलबजावणी करावी, अशी मागणीही खोपडे यांनी केली.

यावेळी खोपडे यांनी पाकिस्तानी दहशतवादी अजमल कसाबबरोबरच्या भेटीचा अनुभव सांगितला. तुम्ही मुंबईवर हल्ला कसा काय करू शकलात, असा सवाल कसाबला विचारला असता त्याने हे तुमच्या इंटलिजन्सचे आणि कायदा-सुव्यवस्थेचे नाकर्तेपण असल्याचे सांगितले.