शिक्षणाचा दर्जा सुधारण्यासाठी प्रयत्नशील - मुख्यमंत्री

मुंबई : यंदाच्या वर्षात शिक्षणावरून राज्यात मोठमोठी आंदोलने झाली. हे लक्षात घेता शिक्षणावर किती कार्य करावे लागणार आहे, याचा अंदाज येतो. या पार्श्‍वभूमीवर शिक्षण विभाग कामाला लागला असून राज्यातील शिक्षणाचा दर्जा सुधारण्यासाठी राज्य सरकार प्रयत्नशील असल्याचे मुख्यमंत्री पृथ्वीराज चव्हाण यांनी नुकतेच मुंबईत एका कार्यक्रमात पत्रकारांशी बोलताना सांगितले आहे.यंदा शिक्षण हक्क कायद्यानुसार दुर्बल घटकांना २५ टक्के आरक्षण देण्याच्या योजनेचाही पुरता बोजवारा उडाला. आरक्षण जाहीर करूनही एकट्या मुंबईत २५ टक्के आरक्षण झाले. त्यामुळे बर्‍याच जागा रिक्त राहिल्या.या सर्व घडामोडींचा वेध घेऊन शिक्षण विभागानेही कामाला लागले पाहिजे, असे संकेतच जणू मुख्यमंत्र्यांनी दिले आहेत. शिक्षणाचा दर्जा सुधारणे हे राज्य तसेच देशापुढेही मोठे आव्हान असून खेडेगावातून देण्यात येणार्‍या शिक्षणाचाही दर्जा सुधारण्यासाठी राज्य सरकार प्रयत्नशील असल्याचे मुख्यमंत्री पृथ्वीराज चव्हाण यांनी सांगितले.