पालिका कर्मचार्‍यांना सेवा पुस्तिकेची प्रत

मुंबई : राज्य शासनात जशा शासकीय व निमशासकीय अशा दोन सेवा पुस्तिका असतात त्याच धर्तीवर मुंबई महानगरपालिकेच्या प्राथमिक शिक्षण विभागातील शिक्षक-शिक्षकेतर कर्मचार्‍यांना दोन सेवा पुस्तिका तयार करून त्यातील एक सेवा पुस्तिका कर्मचार्‍याकडे द्यावी, अशी मागणी मनसे कर्मचारी संघटनेच्या वतीने अतिरिक्त आयुक्त यांच्याकडे एका निवेदनाद्वारे केली आहे. राज्य सरकार कर्मचार्‍यांची सेवा पुस्तिकेत नोंद ठेवून एक प्रत कर्मचार्‍यांना देतात. त्यामुळे कर्मचार्‍यांना सर्व माहिती उपलब्ध होते, मात्र पालिकेकडे तसे होत नसल्याने त्यांना सर्व नोंदीची माहिती मिळत नाही, याचा परिणाम त्यांना नंतर भोगावा लागतो. ती परिस्थिती त्याच्यावर येऊ नये म्हणून पालिका आयुक्तांनी त्यांना सेवा पुस्तिका उपलब्ध करून द्यावी, अशी मागणी युनियनने केली आहे.