मुंबई : येथील छत्रपती शिवाजी आंतरराष्ट्रीय विमानतळावर विविध महागड्या वस्तूंच्या तस्करीवर नियंत्रण ठेवणार्या सीमाशुल्क विभागाच्या(कस्टम) खात्यात पहिल्यांदाच १ हजार कोटींहून अधिक महसूल जमा झाला आहे. २0१३-१४ या आर्थिक वर्षात सीमाशुल्क विभागाने ११८३.५८ कोटींचा महसूल जमवल्याची माहिती उजेडात आली आहे. गतवर्षीच्या तुलनेत एकूण महसुलात ६३ टक्क्यांची वाढ झाल्याचे स्पष्ट होत आहे.२0१३-१४ या आर्थिक वर्षात सीमाशुल्क विभागासमोर ८३९ कोटींच्या महसुलाचे उद्दिष्ट होते; पण मागील काही महिन्यांत सोने-चांदीच्या दागिन्यांची तस्करी वाढल्याने सीमाशुल्क विभागाच्या पथकाने हे उद्दिष्ट केव्हाच पार केले आणि आर्थिक वर्षाखेरीस महसुलाचा नवा विक्रम प्रस्थापित केला. मागील आर्थिक वर्षात ७२७ कोटींचा महसूल जमा झाला होता. त्या तुलनेत यंदाच्या महसुलात ६३ टक्क्यांची वाढ झाली आहे. सीमाशुल्क विभागाच्या इतिहासात प्रथमच एवढय़ा प्रमाणावर महसूल जमा झाल्याची माहिती छत्रपती शिवाजी आंतरराष्ट्रीय विमानतळावरील सीमाशुल्क विभागाचे आयुक्त ए. पी. एस. पुरी यांनी दिली. सोने-चांदी तस्करीच्या वाढत्या प्रमाणामुळे महसूल वाढल्याचे त्यांनी या वेळी स्पष्ट केले.
Post Top Ad
Post Bottom Ad
