कदमांच्या भाषणामुळे मोदींची गोची

एनडीएचे पंतप्रधानपदाचे उमेदवार नरेंद्र मोदी हे लोकसभा निवडणूक विकासाच्या मुद्दयावर लढवण्यासाठी आग्रही असताना भाजपसह मित्र पक्षांचे नेते बेलगाम वक्तव्ये करून त्यांना गोत्यात आणत असल्याचे दिसत आहे. मुंबईत सोमवारी झालेल्या सभेत मोदींच्या उपस्थितीतच शिवसेना नेते रामदास कदम यांनी मुसलमानांचा बंदोबस्त करण्याची धमकी दिली. इतकेच नव्हे तर, मोदीच हे काम करतील, असे सांगत त्यांनी सगळ्यांनाच बुचकळ्यात टाकले.

मुंबईतील वांद्रा-कुर्ला संकुलात सोमवारी मोदींची जाहीर सभा झाली. या सभेत बोलताना रामदास कदम हे आझाद मैदानातील दंगलीचा उल्लेख करत मुसलमानांवर घसरले. 'हे मुसलमान पोलिसांवर हल्ले करतात, पोलिसांच्या गाड्या जाळतात, शहिदांचं स्मारकं तोडतात आणि महिला पोलिसांवर हात टाकण्यापर्यंत यांची मजल जाते. आम्ही हे खपवून घेणार नाही. आमच्या मायभगिनींच्या अब्रुवर कोणी हात टाकणार असेल तर नरेंद्र मोदी त्यांचा कायमचा बंदोबस्त केल्याशिवाय राहणार नाहीत,' असे कदम म्हणाले.

ठराविक लोकांना धडा शिकविण्यासाठीच जणू मोदी पंतप्रधान होणार आहेत, अशा अर्थाचे वक्तव्य कदम यांनी केल्यामुळे उपस्थित नेते अवाक झाले. व्यासपीठावर उपस्थित असलेले नरेंद्र मोदी व शिवसेनेचे पक्षप्रमुख उद्धव ठाकरे यांचे चेहरेही पडले होते.