आयोगाच्या जाळ्यात रोख २३ कोटी
महाराष्ट्रात निवडणूक आचारसंहिता लागू झाल्यापासून आत्तापर्यंत २३ कोटी ६१ लाखांची रोकड आणि दारूचा पुरवठा करणाऱ्या वाहनांसह २४ कोटी ११ लाखांचा मद्यसाठा निवडणूक आयोगाने जप्त केला आहे. राष्ट्रवादी काँग्रेसचे अध्यक्ष शरद पवार, महाराष्ट्र नवनिर्माण सेनेचे प्रमुख राज ठाकरे यांच्यासह अनेक दिग्गज नेत्यांवर दाखल झालेल्या आचारसंहिता भंगाच्या प्रकरणांचा आकडा ५२३वर गेला आहे. निवडणूक आयोगावर शरद पवार व मुख्यमंत्री पृथ्वीराज चव्हाण यांनी टीका करण्या चे कारण एवढ्या मोठ्या प्रमाणावर झालेली कारवाई हेच असल्याचे बोलले जाते.निवडणूक आचारसंहितेच्या नावाखाली आयोग छळ करीत असल्याची टीका शरद पवार यांनी केली होती; तर, आयोगाच्या कारवाईचा आपणही अनुभव घेतला, असे मुख्यमंत्री पृथ्वीराज चव्हाण यांनी म्हटले होते. आयोगावर हे दोन बडे नेते का बिथरले याचा कानोसा घेतला असता गेल्या काही दिवसांत महाराष्ट्रात २३ कोटी ६१ लाखांची रोख रक्कम, व दारूची वाहतूक करणारी वाहने व दारूसाठा असा २४ कोटी ११ लाखांचा मुद्देमाल आयोगाने ताब्यात घेतला हे कारण असल्याचे सूत्रांनी खासगीत कबूल केले. प्रत्यक्षात आयोगाने अधिक व्यापक कारवाई केली; मात्र ज्यांनी रोख रकमेबाबत हिशेब सादर केला त्यांची रक्कम सोडली. हिशेब न दिल्याने वरील रोख जप्त केली गेली.
शरद पवार यांनी नवी मुंबईत माथाडी कामगारांसमोर बोलताना मतदानाच्या वेगवेगळ्या तारखा असल्याने शाई पुसून दोनवेळा मतदान करण्याचे आवाहन केले. त्याची दखल आयोगाने घेणे क्रमप्राप्त होते. राज ठाकरे यांनी शेतकऱ्यांना 'मारून मरा' अशी चिथावणीखोर भाषा केली. प्रचाराची वेळ संपल्यावरही ध्वनिक्षेपक लावून प्रचार करणे, परवानगी न घेता ध्वनिक्षेपक लावून प्रचार करणे, परवानगी न घेता प्रचारफेरी काढणे वगैरे गुन्ह्यांकरिता ५२३ जणांवर आचारसंहिता भंगाचे गुन्हे दाखल केले आहेत. त्यांची सुनावणी सुरू आहे. राष्ट्रवादी काँग्रेसकडे गृहखाते असल्याने काहीवेळा रेटून नेण्याचा प्रकार त्या पक्षाच्या स्थानिक नेत्यांकडून होतो. त्यामुळे आचारसंहिता भंगाच्या गुन्ह्यांत राष्ट्रवादीची मंडळी आहेत. पवार यांनी निवडणूक आयोगाकडून आचारसंहिता पालनाकरिता होणाऱ्या छळवणुकीबद्दल आगपाखड करण्याचे हेच कारण असल्याचे अधिकाऱ्यांचे मत आहे.
