मुंबईच्या आर्थिक आणि बौद्धिक विकासाचे श्रेय गुजराती समाजाचे आहे, अशा आशयाच्या 'संदेश' या गुजराती वृत्तपत्राच्या जाहिरातींवरून वादंग झाल्यानंतर, बेस्टच्या २०० बसगाड्यांवरील या जाहिराती काढून घेण्याचे काम शनिवारी बेस्ट प्रशासनाने हाती घेतले. या दैनिकाच्या मुंबईतील आवृत्तीची जाहिरात बेस्टच्या २०० बसगाड्यांवर करण्यात आली आहे. मनसेचे संदीप देशपांडे यांनी त्यावर आक्षेप घेतला. बेस्टच्या शुक्रवारच्या बैठकीत त्यावर बराच गोंधळ झाला. त्यानंतर बेस्ट प्रशासनाने २६ बेस्ट डेपोंमधील या जाहिराती काढण्यास सुरुवात केली. पुढील आठवड्यात हे काम पूर्ण होईल, अशी माहिती बेस्टच्या वरिष्ठ अधिकाऱ्यांनी दिली. त्याचवेळी, ही जाहिरात फक्त गुजराती समाजाच्या यशाबाबत भाष्य करणारी होती, अशी प्रतिक्रिया त्या दैनिकाच्या व्यवस्थापनातर्फे व्यक्त करण्यात आली आहे.
