पिचड आणि राऊत यांची बहिष्कारग्रस्त गावाला राऊत भेट

नगर जिल्ह्यात दलित तरुणाचा निर्घृण खून करण्यात आल्याच्या घटनेनंतर जागे झालेले राज्य सरकारमधील दोन ज्येष्ठ दलित मंत्री आज राज्यात दौऱ्याला निघाले. आज, शनिवारी राज्याचे आदिवासी कार्य मंत्री मधुकर पिचड आणि रोहयो मंत्री नितीन राऊत यांनी दलित वस्त्यांना भेट देऊन मदत जाहीर केली आहे.
पिचड यांनी आज नगर जिल्ह्यातील जामखेड तालुक्यातील खर्डा गावाला भेट दिली. या गावात नितीन आगे (वय १७) या तरुणाचा एका उच्चवर्णिय तरुणीसोबत असलेल्या प्रेमप्रकरणातून खून करण्यात आला होता. नितीन आगे याच्या कुटुंबीयांना राज्य सरकारकडून पाच लाख आणि राष्ट्रवादी कॉंग्रेस पक्षाकडून पाच लाख रुपयाची आर्थिक मदत जाहीर करण्यात आली. या प्रकरणाची सुनावणी जलदगती न्यायालयात करण्याची घोषणा राज्याचे गृहमंत्री आर. आर. पाटील यांनी यापूर्वीच केली होती.
बहिष्कारग्रस्त गावाला राऊत यांची भेट
रोहयो मंत्री नितीन राऊत यांनी आज बुलढाणा जिल्ह्यातील बेलाड गावाला भेट दिली. या गावात सवर्णांनी दलित वस्तीवर बहिष्कार घातला आहे. राऊत यांनी गावातील दोन्ही समाजातील प्रतिनिधींची बैठक आयोजित केली होती. दलित वस्तीवरील बहिष्कार न उठवल्यास ग्रामपंचायतीचा निधी रोखून ग्रामपंचायत बरखास्त करण्याचा इशारा मंत्री राऊत यांनी दिला. राऊत यांच्यासोबत राज्याचे अनुसूचित जाती जमाती आयोगाचे अध्यक्ष न्या. सी.एल. थूल यांनी भेट दिली. अशा प्रकारच्या घटना पुन्हा घडणार नाही, याची आश्वासन ग्रामस्थ आणि सरपंचाने दिले असल्याचे न्या. थूल यांनी सांगितले.