‘परे’वर ३ हजार ६९२ फुकटे प्रवासी

विनातिकीट प्रवास करणाऱ्या फुकट्या प्रवाशांना पश्चिम रेल्वेने चांगलाच धडा शिकवला आहे. मुंबई विभागातर्फे बुधवारी दादर रेल्वे स्थानकात विशेष तिकीट तपासणी मोहीम आखण्यात आली होती. ३६ तास चाललेल्या या मोहिमेतून तब्बल ११.२५ लाखांची विक्रमी दंडवसुली करण्यात आली आहे. गेल्या दीड दिवसात ३ हजार ६९२ फुकट्या प्रवाशांना पकडण्यात रेल्वेला यश आले.

विरार ते बोरीवली दरम्यान रेल्वे डब्यांमध्ये तिकीट तपासणी करण्याऐवजी यावेळी पश्चिम रेल्वेने दादर स्टेशनमध्येच तिकीट तपासणी मोहीम आखली होती. अधिकाधिक विनातिकीट प्रवाशांना पकडता यावे यासाठी दादर रेल्वे स्थानकातील प्रत्येक प्रवेशद्वारावर टीसींची फौज तैनात करण्यात आली होती. ही मोहीम वाणिज्य प्रबंधक, वरिष्ठ मंडळ, मुंबई सेंट्रल यांच्या देखरेखीखाली आयोजित करण्यात आली. यात पश्चिम रेल्वेचे अनेक वाणिज्य प्रबंधकही सहभागी झाले होते.

मागील आठ महिन्यांतील ही आठवी विशेष तपासणी मोहीम होती. या काळात आत्तापर्यंत सुमारे ३३ हजार विनातिकीट प्रवाशांवर कारवाई करण्यात आली असून दंड स्वरूपात वसूल करण्यात आलेल्या निधीची रक्कम ७९ लाखांपर्यंत पोहोचली आहे. या मोहिमांमध्ये २ हजार ७६७ टीसी आणि ५२४ आरपीएफ कर्मचाऱ्यांना सहभागी करून घेण्यात आले होते. या मोहिमांच्या पार्श्वभूमीवर पश्चिम रेल्वेने प्रवाशांना योग्य तिकीट काढूनच प्रवास करण्याचे आवाहन केले आहे.