मुंबई / जेपीएन न्यूज (http://jpnnews.webs.com) एकापेक्षा जास्त सरकारी फ्लॅट घेऊन गरिबांसाठीच्या योजनांचा होणारा दुरुपयोग पत्रकार केतन तिरोडकर यांनी हायकोर्टात याचिका दाखल करून उघड केला. हायकोर्टाने याप्रकरणी म्हाडाकडून १० जूनपर्यंत माहिती मागवली आहे. म्हाडाच्या वेबसाइटवर एकापेक्षा जास्त फ्लॅट घेणाऱ्या २८ जणांची यादी जाहीर केली असून त्यांच्याबद्दल कोणाकडे माहिती असेल तर ती द्यावी, असे आवाहन जनतेलाच केले आहे.
म्हाडाने जाहीर केलेल्या या यादीत एकाही राजकीय नेत्याचा उल्लेख नाही हे विशेष. हायकोर्टात दाखल करण्यात आलेल्या याचिकेमुळे अनेक राजकीय नेत्यांनी आपल्या मुलांच्या, पत्नीच्या नावाने एकापेक्षा जास्त फ्लॅट घेतल्याचे उघड झाले आहे. वर्सोवा येथील राजयोग, आशीर्वाद आदी सोयाट्यांमध्ये राजकीय नेत्यांचे, त्यांच्या नातेवाईकांचे अनेक फ्लॅट आहेत. ही माहिती तिरोडकर यांनीच उघड केली आहेत. म्हाडाने मात्र आपली माहिती अद्यापि हायकोर्टाला सादर केली असून १० जूनला होणाऱ्या सुनावणीत म्हाडाने ही माहिती सादर करावी, असा आदेश हायकोर्टाने दिला आहे. याच दरम्यान म्हाडाने एकापेक्षा जास्त फ्लॅट घेणाऱ्यांची नावे एका वेबसाइटवर एका नोटीसद्वारे जाहीर केली आहे. त्यांच्याबाबत माहिती देण्याचे आवाहन जनतेलाच केल्यामुळे म्हाडाकडे याबाबत माहिती नाही काय, असा सवाल नागरिकांकडून केला जात आहे. एका बाजूला सर्वसामान्य लोकांची नावे वेबसाइटच्या माध्यमातून जाहीर करताना राजकीय नेत्यांच्या नावाची यादी वेबसाइटवर का टाकण्यात आली नाही, असा सवालही केला जात आहे.
