माळीण गावात नातेवाईकांचा आक्रोश

पुणे : दरड कोसळण्याची भीषण दुर्घटना घडलेले माळीण गाव गुरुवारीही शोकसागरात बुडालेले होते. दुर्घटनेची माहिती मिळताच गावातील लोकांच्या ठिकठिकाणच्या नातेवाईकांनी घटनास्थळाकडे धाव घेतली. समोर उद्ध्वस्त झालेले गाव, त्यामध्ये गाडली गेलेली रक्ताची, जिव्हाळ्याची माणसं पाहून सर्व नातेवाईक धायमोकलून रडत होती. त्यांचा हा आक्रोश हृदय पिळवटून टाकणारा होता. येणार्‍या सर्वांचाच कोणी ना कोणी गेलेला असल्याने धीर कोणी कोणाला द्यायचा हाच प्रश्न येथे निर्माण झाला होता. दरम्यान, या दुर्घटनेतील मृतांची संख्या वाढून ती आता ३७ झाली असून मातीच्या ढिगार्‍याखाली १५७ जण दबले गेले असल्याची भीती आहे. बचाव कार्य अद्यापही युद्धपातळीवर सुरू असून ढिगारा उपसण्यास आणखी दोन ते तीन दिवस लागण्याची शक्यता आहे.