गोविंदांवर तत्काळ उपचार पालिकेच्या हॉस्पिटलध्ये विशेष व्यवस्था

गोविंदा उत्सवाच्या दरम्यान जखमी होणाऱ्या गोविंदांवर तत्काळ उपचार करण्यासाठी मुंबई महापालिकेच्या हॉस्पिटलध्ये विशेष व्यवस्था करण्यात आली आहे. केईएम, सायन व नायर हॉस्पिटलमध्ये जखमी गोविंदांवर उपचार करण्यासाठी प्रत्येकी १० राखीव खाटांची व्यवस्था करण्यात आली आहे. मुंबई महापालिकेची केईएम, सायन व नायर हॉस्पिटलशिवाय उपनगरातील २६ हॉ‌स्पिटलांमध्येही प्रत्येकी दहा खाटांची व्यवस्था केली आहे. वैद्यकीय अधिकाऱ्यांना चोवीस तास कामावर राहण्याच्या सूचना देण्यात आल्या आहेत, अशी माहिती पालिका हॉस्पिटलच्या वैद्यकीय शिक्षण संचालक डॉ. सुहासिनी नागदा यांनी सांगितले. 


५९ हजार गोविंदांचा विमा

यंदा ९८२ गो‌विंदा मंडळांच्या ५९ हजार ६२१ खेळाडूंनी दहीहंडीसाठी विमा उतरवला आहे. गेल्यावर्षी हाच आकडा एक लाखाहून अधिक होता. त्यामुळे ४० हजारांहून अधिक गो‌विंदा विम्याच्या सुरक्षेशिवायच उत्‍सवात सहभागी होणार आहे, अशी माहिती ओरिएंटल इन्‍श्युरन्‍सचे सहाय्यक प्रबंधक सचिन खानविलकर यांनी सांगितले. यंदा वसई विरार महापालिकेने त्यांच्या हद्दीतील ५४ गोविंदा मंडळांचा विमा उतरवला आहे. १२ वर्षांखालील मुलांच्या दहीहंडीतील सहभागावर आलेला निर्बंध, राजकीय पक्षांकडून तसेच नेत्यांकडून विविध मंडळांचा विमा उतरवण्याच्या संख्येत झालेली घट, दहीहंडी उत्सवाबाबत शेवटच्या क्षणापर्यंत असलेली अनिश्चितता यामुळे विमा उतरवणाऱ्या मंडळांमध्ये घट झाल्याचे बोलले जात आहे.

महिला गोविंदा मंडळेही घटली

१२ वर्षांखालील गोविंदांना दहीहंडी उत्सवात सहभागी करून घेण्यास आलेल्या निर्बंधाचा सर्वाधिक फटका महिला गोविंदा मंडळांना बसला आहे. मुंबई ठाण्यात मिळून ५०हून अधिक महिला गो​विंदा मंडळे आहेत. त्यातील १५च्या आसपास मंडळे यंदा बंद झाली आहेत. तर काहींनी केवळ स्वतःच्या विभागातच हा उत्सव साजरा करण्याचा​ निर्णय घेतला आहे. महिला गोविंदा मंडळांमध्ये १२ वर्षांखालील मुलींचे प्रमाण ३० टक्क्यांहून अधिक असते. त्यामुळे त्याचा मंडळांवर मोठा परिणाम झाला आहे, असे पार्ले स्पोर्ट क्लब महिला गोविंदा मंडळाची प्रमुख गीता झगडे यांनी सांगितले.

जांबोरी मैदानात गाद्या, मॅट

जांबोरी मैदानातील संकल्प प्रतिष्ठानचा दहीहंडी उत्सव हा मुंबईतील गो​विंदांचे प्रमुख आकर्षणाचे केंद्र असते. यंदा गोविंदांच्या सुरक्षेसाठी मैदानात भुसा भरलेल्या गाद्या तसेच फोमची व्यवस्था करण्यात आली आहे. हायकोर्टाच्या निर्देशानुसार वरच्या थरांवर चढणाऱ्या गोविंदांना सुरक्षेसाठी आवश्यक ती सर्व सेफ्टी उपकरणेही गोविंदांना प्रतिष्ठानकडून दिली जाणार आहेत. त्याशिवाय यंदा पहिल्यांदाच व्हिडीओ मॅपिंग तंत्रज्ञानाद्वारे स्टेजवर आकर्षक दृश्ये पाहायला मिळणार आहेत. लेझर शोसोबतच अजय देवगणसह अनेक बॉलिवुड आणि मराठी कलाकारांची उपस्थिती हे उत्सवाचे आकर्षण असेल, अशी माहिती संकल्प प्रतिष्टानचे प्रमुख सचिन अहिर यांनी सांगितले.

अॅम्ब्युलन्स

प्रभादेवी येथील सिद्धिविनायक मंदिराच्यावतीने जखमी गोविंदांसाठी चार मोफत अॅम्ब्युलन्सची व्यवस्था केली आहे. यामध्ये डॉक्टरांचे पथकही असले. या अॅम्ब्युलन्स लालबाग, भायखळा, परळ, वरळी व दादरमध्ये तैनात केल्या जातील. अॅम्ब्युलन्सद्वारे त्यांना प्रथमोचार दिले जातील. त्यानंतर जवळच्या हॉस्पिटलमध्ये दाखल केले जाईल. 
संपर्क : ९२२४२४५७०९.
स्टर्लिंग व्होकार्ड हॉस्पिटलनेही सामाजिक जाणीवेतून मोफत अॅम्ब्युलन्सची सोय केली आहे. या अॅम्ब्युलन्समध्ये डॉक्टर, नर्स व वैद्यकीय मदतनीस तैनात असेल. 
संपर्क : ६६८००४४०