पालिकेचे अनुदान - बेस्ट नवीन ३०० बस विकत घेणार

बेस्टच्या ३०० बस बेस्टमधून भंगारात निघणार असून त्याजागी तितक्याच नवीन बसखरेदी केल्या जाणार आहेत. या खरेदीसाठी लागणारे सर्व पैसे पालिका बेस्टला देणार आहे. हे पैसे पालिका अनुदान म्हणून देणार असल्याने बेस्टला ते परत करावे लागणार नाहीत. 


बेस्ट उपक्रम आर्थिकदृष्ट्या तोट्यात असून ढासळलेला डोलारा सावरण्यासाठी खासगी बँकाही उपक्रमाला कर्ज देण्यास तयार नाहीत. त्यामुळे मागील वर्षी पालिकेने बेस्टला तब्बल १६०० कोटी रुपयांचे कर्ज दिले आहे. बेस्ट भाडेवाढ टाळण्यासाठीही मागील वर्षी १५० कोटी रुपये अनुदान दिले होते. येत्या काळात मोडीत निघणाऱ्या ३०० बसच्या जागी नवीन बस खरेदी करण्याचे संकट बेस्टसमोर उभे होते. त्यावेळेस पालिकेने मदतीचा हात दिल्याने उपक्रमाला मोठा आधार मिळाला आहे. 

पालिकेचा सन २०१४-१५च्या अर्थसंकल्पाला बुधवारी स्थायी समितीने मंजुरी दिली. त्यावेळेस समितीचे अध्यक्ष शैलेश फणसे यांनी बेस्टच्या अनुदानावर शिक्कामोर्तब केले. टेंडर काढून बेस्ट बसखरेदी करणार असल्याचे फणसे यांनी स्पष्ट केले. बेस्टच्या परिवहन विभागाला सुमारे ७०० कोटींची तूट असून भाडेवाढीनंतरही ती भरून निघणारी नाही. त्यामुळे नवीन बसखरेदीचा पेच उपक्रमासमोर उभा होता. बस खरेदीसाठी पालिका अनुदान देणार असल्याने एमयूटीपीप्रमाणे बसवर पालिकेचा लोगो लावण्याची अट पालिका बेस्टला घालणार असल्याचे सांगण्यात आले.