उपनगरी रेल्वे मार्गावर मेगाब्लॉक

मुंबई : उपनगरी रेल्वे मार्गावरील ओव्हरहेड वायर, सिग्नल यंत्रणा आणि रेल्वे रुळांच्या दुरुस्ती आणि देखभालीसाठी मध्य रेल्वे मार्गावरील मेन लाइन आणि हार्बर मार्गावर रविवार, ३0 ऑगस्ट रोजी मेगाब्लॉक घेण्यात येणार आहे. मेन लाइनवर माटुंगा ते मुलुंड स्थानकांदरम्यान डाऊन जलद मार्गावर तर हार्बर मार्गावर पनवेल ते नेरूळ स्थानकांदरम्यान अप आणि डाऊन दोन्ही मार्गांवर दुरुस्तीची कामे करण्यात येणार आहेत. मेन लाइनवर माटुंगा ते मुलुंड स्थानकांदरम्यान डाऊन जलद मार्गावर सकाळी १0.४५ ते दुपारी ३.१५ वाजेपर्यंत दुरुस्तीची कामे करण्यात येणार आहेत. ब्लॉकदरम्यान माटुंगा ते मुलुंड स्थानका दरम्यानची डाऊन जलद मार्गावरील वाहतूक डाऊन धीम्या मार्गावरून चालवण्यात येणार आहे. त्यामुळे या लोकल गाड्या आपल्या निर्धारित वेळेपेक्षा २0 मिनिटे उशिराने पोहोचणार आहे. तसेच अप जलद मार्गावरील लोकल गाड्यांना सकाळी १0.४६ ते दुपारी ३.२८ या वेळेत मुलुंड, भांडुप, विक्रोळी, घाटकोपर आणि कुर्ला या स्थानकांवर थांबा देण्यात येणार आहे. त्यामुळे त्या आपल्या निर्धारित वेळेपेक्षा १0 ते १५ मिनिटे उशिराने धावणार आहेत. तसेच अप आणि डाऊन धीम्या मार्गावरील लोकल गाड्या सकाळी ११ ते दुपारी ५ वाजेपर्यंत १0 मिनिटे उशिराने धावणार आहेत. ब्लॉक दरम्यान डाऊन दिशेला जाणार्‍या सर्व मेल-एक्स्प्रेस गाड्या माटुंगा ते मुलुंड स्थानकांदरम्यान डाऊन धीम्या मार्गावरून चालवण्यात येणार आहेत.हार्बर मार्गावर पनवेल ते नेरूळ स्थानकांदरम्यान अप आणि डाऊन दोन्ही मार्गावर सकाळी ११ ते दुपारी ३ वाजेपर्यंत दुरुस्तीची कामे करण्यात येणार आहे. ब्लॉक दरम्यान हार्बर मार्गावरील पनवेल ते नेरूळ स्थानकांदरम्यानची अप आणि डाऊन दोन्ही मार्गांवरील वाहतूक सकाळी १0.४१ ते दुपारी ३.२७ या वेळेत बंद राहणार आहे. तसेच ट्रान्स हार्बर मार्गावरील वाहतूकदेखील पनवेल ते नेरूळ स्थानकांदरम्यान सकाळी ११.0५ ते दुपारी ३.१९ या वेळेत पूर्णपणे बंद राहणार आहे. पनवेल-अंधेरी दरम्यानची लोकल सेवा देखील ब्लॉक काळात बंद राहणार आहे. प्रवाशांच्या सोयीसाठी सीएसटी ते नेरूळ आणि ट्रान्स हार्बर मार्गावर ठाणे ते नेरूळ स्थानकांदरम्यान स्पेशल लोकल चालवण्यात येणार आहेत.