सफाई कामगारांच्या नियुक्तीत वारसा पद्धत कायम

मुंबई : सफाई कामगारांच्या नियुक्तीमध्ये वारसा पद्धत कायम ठेवण्याचा निर्णय राज्य मंत्रिमंडळाच्या बैठकीत घेण्यात आला आहे. वाल्मिकी-मेहेतर समाजातील सफाई कामगाराच्या नियुक्तीमध्ये लाड समितीने शिफारस केलेली वारसा पद्धत यामुळे पुढे कायम ठेवण्यात येणार आहे. त्याचसोबत अनुसूचित जातीतील इतर सफाई कर्मचार्‍यांच्या वारस किंवा नातेवाईकांसही या योजनेचा लाभ देण्याचा निर्णय घेण्यात आला आहे. लाड समितीच्या शिफारशी ४0 वर्षांपूर्वी लागू केल्या असल्या तरी सद्यस्थितीत त्या कायम ठेवणे आवश्यक होते. त्यानुसार, याबाबत सामाजिक न्याय व विशेष साहाय्य विभागाने यासंदर्भात घेतलेली भूमिका यापुढेही कायम ठेवण्यात आली आहे. सफाई कर्मचारी म्हणून सेवानवृत्त झालेल्या किंवा सेवेत असताना निधन झालेल्या अनुसूचित जातीमधील इतर कर्मचार्‍यांच्या वारस किंवा नातेवाईकांस या योजनेचा लाभ देण्यात येणार आहे. सफाई कामगार आणि अस्वच्छ व्यवसायातील कामगारांच्या काम व सेवांबाबत २0 जून १९७२ रोजी लाड समिती नेमण्यात आली होती. या समितीने केलेल्या शिफारशी स्वीकारून त्यानुसार त्याची कार्यवाही करण्याच्या सूचना देण्यात आल्या होत्या. यासह विविध उपाययोजना करूनही समाजातील अस्पृश्यतेचे समूळ उच्चाटन होऊ शकले नाही. त्यामुळे अस्पृश्यता निर्मूलनार्थ उपाययोजना सुचवण्यासाठी वि.स. पागे यांच्या अध्यक्षतेखाली ९ फेब्रुवारी १९७३ मध्ये समिती नेमण्यात आली होती. या समितीने सखोल अभ्यास करून केलेल्या शिफारशींच्या अंमलबजावणीसाठी शासनाने १९७९ मध्ये निर्णय घेतला. उच्च न्यायालयात २0१४ मध्ये दाखल झालेल्या एका याचिकेनुसार लाड व पागे समितीच्या शिफारशीनुसार वारसा हक्काने होत असलेल्या सफाई कामगारांच्या नियुक्तीबाबत आक्षेप नोंदवण्यात आला होता. ही याचिका न्यायालयाने निकाली काढली होती.