जलयुक्त शिवार, आदिवासी विकास या विषयांवर छायाचित्र स्पर्धा

मुंबई, दि. 5 : दरवर्षी 19 ऑगस्ट हा जागतिक छायाचित्र दिन म्हणून साजरा करण्यात येतो. या निमित्ताने माहिती व जनसंपर्क महासंचालनालयातर्फे महाराष्ट्रातील छायाचित्रकारांसाठी छायाचित्र स्पर्धा जाहीर करण्यात आली आहे.

या स्पर्धेतंर्गत छायाचित्रकारांनी ‘जलयुक्त शिवार’ व ‘आदिवासी विकास’ या दोन विषयांशी संबंधित छायाचित्रे काढून ती exhibition.dgipr@maharashtra.gov.in या ई-मेल पत्त्यावर फोटो ओळींसह (कॅप्शन) पाठवावीत. छायाचित्रांचा तांत्रिक दर्जा उत्कृष्ट असण्यासाठी ती हाय डेफिनेशन (HD Formate) प्रकारात कमीत कमी १२८० X ७२० px resolution मध्ये असावीत. दोन्ही प्रकारात निवड झालेल्या पहिल्या 3 छायाचित्रांना अनुक्रमे 5 हजार, 3 हजार व 2 हजार असे पुरस्कार दिले जातील.

या व अन्य छायाचित्रांचा उपयोग माहिती संचालनालयातर्फे प्रकाशित करण्यात येणाऱ्या लोकराज्य मासिक, वृत्तपत्र, जाहिरात, सोशल मिडिया, प्रदर्शने अशा विविध प्रसिद्धी माध्यमांसाठी करण्यात येईल. छायाचित्र पाठवावयाची अंतिम तारीख 15 जुलै, 2016 अशी आहे.