मुंबई मेट्रोकडून 500 आणि 1000 रूपयांचे चलन स्वीकारले जात नाही, अशा काही तक्रारी प्राप्त झाल्या होत्या. मुंबई मेट्रोला हे चलन स्वीकारण्याचे निर्देश देण्यात आले असून त्यांनीही अनुकूल कार्यवाहीचे आश्वासन सरकारला दिले आहे. या निर्णयामुळे आता चलनाच्या समस्येमुळे सामान्यांना कोणताही त्रास सहन करावा लागणार नाही, असेही मुख्यमंत्र्यांनी स्पष्ट केले आहे.
बँक आणि पोष्टामध्ये 500 व 1000 रुपयांच्या चलनी नोटा स्वीकारण्याची मुदत डिसेंबर अखेरपर्यंत आहे. या निर्णयामुळे शेतकरी आणि गृहिणींच्या पैशाला कोणतीही बाधा येणार नाही. वैध मार्गाने मिळविलेला पैसा सुरक्षित राहणार असून त्यामुळे जनतेने गोंधळून जाऊ नये, तसेच गर्दी करू नये. काळा पैसा आणि भ्रष्टाचाराला आळा घालण्यासाठी केंद्र सरकारने घेतलेल्या निर्णयाचे आपण सर्वांनी मिळून स्वागत करुया, असे आवाहनही मुख्यमंत्र्यांनी केले आहे.
