माटुंगा पोलीस ठाण्याच्या हद्दीतील हिंदू कॉलनीमध्ये एका गाडीतून मोठय़ा प्रमाणात रोकड जाणार असल्याची माहिती क्राईम ब्रँचच्या युनिट पाचला मिळाली होती. त्यानुसार, पोलीस पथकाने या ठिकाणी सापळा लावला. या ठिकाणहून निघालेल्या गाडीची पोलिसांनी झडती घेतली असता, काही बॅगांमध्ये मोठय़ा प्रमाणात नवीन 2 हजार रुपयांच्या नोटा असलेली 73 लाख तसेच 100 रुपयांच्या नोटा असलेली 12 लाख अशी एकूण 85 लाखांची रोकड सापडली.
बँकेतून केवळ 24 हजार रुपये रक्कम काढण्याची मर्यादा असताना जुन्या नोटांच्या बदल्यात एवढी मोठी नवीन नोटांमध्ये रक्कम या फर्मला कशी आणि कोठून मिळाली? तसेच ही रक्कम कोणाला देण्यात येणार आहे याची चौकशी सुरू आहे. मात्र, ही नवीन रक्कम एका ज्वेलर्स मालकाला जुन्या रकमेच्या बदल्यात देण्यात येणार होती, अशी माहिती समोर आली आहे. तर दुसरीकडे माजी मुख्यमंत्र्यांच्या भाच्याला जुन्या नोटांच्या बदल्यात ही नवीन रोकड देण्यात येणार होती असेही समजते. त्यामुळे हा माजी मुख्यमंत्र्याचा भाचा कोण याकडे प्राप्तीकर विभागाची करडी नजर राहणार आहे.
