एसडब्लूडीमधील घोटाळ्याच्या चौकशीच्या भीतीने अधिकाऱ्यांचे धाबे दणाणले -
नाले व रस्ते घोटाळ्या प्रमाणे चौकशी करा -मुंबई / अजेयकुमार जाधव -
मुंबई महानगरपालिकेच्या एसडब्लूडी (पर्जन्य जल वाहिन्या) विभागाकडून सन २०१४ मध्ये १६८ व १८२ या निविदेमधून रफी नगर, बैंगणवाडी, बाप हेरिटेज, ज्ञानसाधना हायस्कुल नाल्याच्या बाजूने संरक्षण भिंत बांधणे, नाल्यांचे खोलीकरण, रुंदीकरण करण्याचे कंत्राट आर. ई. इन्फ्रा.ला देण्यात आले. या कामामध्ये २३० कोटी रुपयांचा घोटाळा झाला असून या प्रकरणाची चौकशी लागण्याच्या भीतीने मुंबई महानगर पालिकेच्या अधिकाऱ्यांनी आपली बदली करून घेण्याचा प्रयत्न सुरु केला असून एका अधिकाऱ्याने व्हीआरएस घेतला असल्याची माहिती उपलब्ध झाली आहे.
जाहिद शेख यांनी आरटीआय मधून मिळवलेल्या कागदपत्रांमधून सदर घोटाळा उघड झाला आहे. आरटीआय मधून मिळालेल्या माहितीमधून आर.ई. इन्फ्रा या कंत्राटदाराने कागदपत्रांची व बँक ग्यारेंटीची पूर्तता केली नसताना अधिकाऱ्यांनी कंत्राट दिले. नाल्यामध्ये झोपड्या उभ्या असताना कंत्राटदाराला सॉईल टेस्टिंग व इतर कामाचा निधी गेले दोन ते तीन वर्षे दिला जात आहे. आर.ई. इन्फ्रा या कंत्राटदाराला मुंबई महानगर पालिकेने रस्ते घोटाळ्यामध्ये काळ्या यादीत टाकले आहे. काळ्या यादीत टाकलेल्या कंत्राटदाराकडून एसडब्लूडी विभाग आजही कामे करून घेत असून कंत्राटदाराला लागेल तितका निधी मंजूर करून देत असल्याने एसडब्लूडी विभाग आर. ई. इन्फ्रा या कंत्राटदारावर मेहरबान का असा प्रश्न जाहिद शेख यांनी उपस्थित करत सादर प्रकरणाची चौकशी करण्याची मागणी केली आहे.
मुंबई महानगरपालिकेच्या एसडब्लूडी (पर्जन्य जल वाहिन्या) विभागाकडून देण्यात आलेल्या या कामामध्ये एम पूर्व विभागातील अधिकारी व एसडब्लूडी विभागातील अधिकारी सामील आहेत. आरटीआय कार्यकर्ते जाहिद शेख यांनी माहिती अधिकारातून सदर घोटाळ्याची कागदपत्रे मिळवली असून शेख हे आता मीडियामधून घोटाळा उघड करणार, घोटाळा उघड केल्यास नाले सफाई व रस्ते घोटाळ्या मध्ये अधिकाऱ्यांवर कारवाई झाली तशीच कारवाई आपल्यावर होऊन आपल्या नोकऱ्या धोक्यात येण्याच्या भीतीने एम पूर्व विभागाचे वसाहत अधिकारी अनिल पवार यांनी आपली बदली एफ दक्षिण विभागात करून घेतली आहे तर एसडब्ल्यूडीचे उप मुख्य अभियंता पूर्व उपनगरे एस. जी. परुळकर यांनी व्हीआरएस घेतला आहे.
मुंबई महापालिकेच्या एसडब्लूडी (पर्जन्य जल वाहिन्या) विभागातील दोन कंत्राटात २३० कोटीहुन मोठा घोटाळा झाला आहे. सदर घोटाळा आर. ई. इन्फ्रा कंत्राटदार तसेच एसडब्लूडी विभागातील मुख्यालयापासून, एसडब्लूडी पूर्व उपनगरे विभाग, एम पूर्व विभाग, वसाहत विभाग यामधील अधिकाऱ्यांच्या संगनमताने झाला आहे. यामुळे रस्ते आणि नाले सफाई घोटाळ्याच्या चौकशी प्रमाणेच एसडब्लूडी घोटाळ्याची चौकशी करून दोषी कंत्राटदार व अधिकाऱ्यांवर कारवाई करावी अशी मागणी आरटीआय कार्यकर्ते जाहिद शेख यांनी केली आहे.
