मुंबई - राज्यातील स्थानिक स्वराज्य संस्थांच्या निवडणुकीसाठीची रणधुमाळी औपचारिकपणे सुरु झाली असून, ८ वर्षांनंतर २ डिसेंबर रोजी २४६ नगरपरिषद व ४२ नगरपंचायतींसाठी मतदान आणि ३ डिसेंबरला मतमोजणी होणार आहे. या घोषणेनंतर अवघ्या २४ तासांतच राज्यातील महायुती आणि महाविकास आघाडीत (मविआ) राजकीय तणाव उफाळला आहे. मित्रपक्षांनी परस्परांविरुद्धच उमेदवार देण्याचे संकेत दिल्याने “युतीपूर्वीच सुरुंग” पडल्याचे चित्र दिसत आहे. मात्र, मतदानापूर्वी एकत्र येणे शक्य नसले तरी निकाल लागल्यानंतर राजकीय समीकरणे बदलण्याची आणि पुन्हा हातमिळवणी होण्याची शक्यता वर्तवली जात आहे.
फडणवीसांचा इशारा : मतदानापूर्वी नाही, पण निकालानंतर युती नक्कीच -
मुख्यमंत्री देवेंद्र फडणवीस यांनी स्पष्ट केले की, “महायुती शक्यतो एकत्र लढेल, पण जर मतदानापूर्वी युती जमली नाही तरी निकाल लागल्यानंतर एकत्र येऊ.”
बारामतीत राष्ट्रवादी काँग्रेस (अजित पवार गट) कडून जय पवार हे उमेदवार असण्याची शक्यता असून, त्यांच्या विरोधात भाजपही उमेदवार देणार अशी चर्चा रंगली आहे.
कर्जतमध्ये उद्धव ठाकरे गट आणि अजित पवार गट एकत्र येऊन शिंदे गटाविरुद्ध मैदानात उतरण्याची तयारी करत आहेत, तर छत्रपती संभाजीनगरच्या सिल्लोडमध्ये शिंदेसेना विरुद्ध भाजप अशी लढत संभवते. शरद पवार यांनी मात्र “भाजपविरोधात कोणाशीही हातमिळवणी करा” असा इशारा आपल्या कार्यकर्त्यांना दिल्याने मविआतील अंतर्गत ताण उघड झाला आहे.
मनसे आणि ठाकरे गट स्वतंत्र वाटेवर -
राज्याच्या राजकारणात चर्चेत असलेल्या ठाकरे बंधूंच्या एकत्र येण्याच्या शक्यता संपुष्टात आल्याचे दिसते. मनसेने पहिल्या टप्प्यातील निवडणुका स्वबळावर लढवण्याचा निर्णय घेतला आहे. नाशिकमध्ये मनसेचे प्रदेश सरचिटणीस दिनकर पाटील यांनी “मनसे नवनिर्माणाच्या तयारीत आहे” असे जाहीर केले, तर नितीन सरदेसाई यांनी “अद्याप युतीबाबत निर्णय झालेला नाही” असे सांगून दार उघडे ठेवले आहे.
काँग्रेसचा ‘एकल’ खेळ : बिहारच्या समीकरणांचा परिणाम -
मनसेला मविआमध्ये घेण्यास काँग्रेसच्या महाराष्ट्रातील नेत्यांनी विरोध दर्शवला आहे. काही ठिकाणी काँग्रेस स्वतःच्या बळावरच लढण्याच्या तयारीत आहे. विदर्भात भाजपविरुद्ध थेट काँग्रेस-भाजप अशी द्विपक्षीय लढत दिसणार आहे.
कार्यकर्त्यांच्या राजकारणाचा प्रभाव -
राजकीय विश्लेषकांच्या मते, स्थानिक स्वराज्य संस्थांच्या निवडणुका या कार्यकर्त्यांच्या ताकदीच्या असतात. स्थानिक पातळीवर नेत्यांना आपल्या गटातील कार्यकर्त्यांना लढण्याची संधी द्यावी लागते. त्यामुळे मोठ्या पक्षांसाठी आघाडी-युती टिकवणे कठीण जाते. “कार्यकर्त्यांचे मन राखणे” आणि त्यांची भविष्याची राजकीय वाटचाल सुनिश्चित करणे हे स्थानिक नेत्यांचे प्रमुख उद्दिष्ट असते.
फडणवीसांचे विधान : स्थानिक पातळीवरच होईल निर्णय
फडणवीस म्हणाले, “महायुतीतील नेतेच स्थानिक पातळीवर युतीचे निर्णय घेतील. कोणत्याही परिस्थितीत भाजप, शिंदेसेना आणि अजित पवारांचा गट एकत्र राहील.” राज ठाकरे यांच्या निवडणुका पुढे ढकलण्याच्या मागणीवर त्यांनी प्रतिक्रिया देताना म्हटले की, “सर्वोच्च न्यायालयाच्या आदेशामुळे निवडणुका पुढे ढकलता येणार नाहीत.”
सोलापूर, अहिल्यानगर, जळगावमध्ये वेगवेगळे समीकरणे -
सोलापूर: उद्धवसेना काँग्रेसपासून दूर, शरद पवार गट मात्र आघाडीत सक्रिय. भाजपमध्ये अंतर्गत गटबाजीचे ग्रहण.
अहिल्यानगर: ११ नगरपरिषदा व एका नगरपंचायतीत “महायुती विरुद्ध महायुती” अशी लढत होण्याची शक्यता. श्रीरामपूरमध्ये काँग्रेस एकटी, शिंदेसेना ताकद आजमावणार.
जळगाव: शिंदेसेना आणि भाजप परस्परांविरुद्ध. पाचोरा-भडगावमध्ये दोन्ही गटांनी स्वबळाची घोषणा केली.
एकंदरीत चित्र -
राज्यातील नगरपरिषदा आणि नगरपंचायतींच्या निवडणुकीत सर्वच पक्षांना स्वबळाची खुमखुमी आहे.
युती व आघाड्यांमधील मतभेद उफाळले असले तरी निकालानंतर राजकीय गणिते पुन्हा बदलण्याची शक्यता नाकारता येत नाही. सध्या तरी महाराष्ट्रात “प्रत्येक पक्ष आपापल्या ताकदीची चाचपणी” करत असल्याचे स्पष्टपणे दिसत आहे.
No comments:
Post a Comment