प्रसारणमाध्यम क्षेत्रात ७४ टक्के गुंतवणुकीला परवानगी

प्रसारणमाध्यम क्षेत्रात ७४ टक्के गुंतवणुकीला परवानगी नवी दिल्ली - प्रसारण माध्यम क्षेत्राला अधिक खुले करण्याच्या हेतूने केंद्र सरकारने शुक्रवारी या क्षेत्रात ७४ टक्के थेट परकीय गुंतवणुकीला मान्यता दिली. मात्र, यात दूरचित्रवाणीवरील वृत्तवाहिन्या आणि एफएम रेडिओ यांचा समावेश नाही. या क्षेत्रांसाठी एफडीआयची कमाल मर्यादा २६ टक्के आहे. थेट परकीय गुंतवणुकीला परवानगी दिलेल्या क्षेत्रात डीटीएच. एचआयटीएस, मल्टि सर्व्हिस ऑपरेटर्स आणि केबल टीव्ही या क्षेत्रांचा समावेश आहे. आतापर्यंत केबल टीव्ही आणि डीटीएच क्षेत्रात ४९ टक्के परकीय गुंतवणुकीची मुभा होती तर एचआयटीएस क्षेत्रात हेच प्रमाण ७४ टक्के इतके होते. एचआयटीएस या उपग्रह सेवेच्या माध्यमातून केबल चालकांना दूरचित्रवाणी वाहिन्या उपलब्ध केल्या जातात. त्याचबरोबर भविष्यातील आघाडीचे माध्यम ठरू शकणा-या मोबाइल टीव्ही क्षेत्रातही ७४ टक्के परकीय गुंतवणुकीला परवानगी देण्यात आली आहे.