फोर्टमध्ये अवयवदानाचा संकल्प

फोर्ट विभाग सार्वजनिक गणेशोत्सव मंडळांच्या कार्यकर्त्यांनी अवयवदान करण्याचे महत्त्वपूर्ण पाऊल यावर्षी उचलले आहे . समाजातील भक्तांमध्ये अवयवदाना विषयी जागृती करण्यासाठीही मंडळाच्या माध्यमातून प्रयत्न केले जाणार आहेत . 

महत्त्वाचे अवयव निकामी झाल्याने राज्यातील हजारो रुग्णांना जीव गमावावा लागतो . समाजात याविषयी फारशी जागृती नसल्याने , तसेच अवयव दानाविषयी अनेक गैरसमज असल्याने मृत्यूनंतर अवयव दानास मान्यता देणारे दाते पुढे येत नाही . माजी मुख्यमंत्री विलासराव देशमुख यांच्या निधना नंतरही ही बाब अधोरेखित झाली . या पार्श्वभूमीवर फोर्ट विभाग सार्वजनिक गणेशोत्सव मंडळाच्या दहा कार्यकर्त्यांनी मृत्यूनंतर अवयव दान करण्याचा संकल्प केला . मंडळाचे प्रमुख संचालक रवींद्र सुर्वे यांनी मृत्यूनंतर अवयवदान करण्यासाठी सरकारी विभागीय प्रत्यारोपण समन्वय केंद्राकडे नाव नोंदणी करून डोनर कार्ड घेतले आहे . त्यानंतर मंडळाच्या इतर दहा कार्यकर्त्यांनीही अवयवदानासाठी नाव नोंदणी केली . मंडळाच्या कार्यकर्त्यांच्या या मदतीचे प्रत्यारोपण समन्वय समितीनेही कौतुक केले आहे . 

अवयव दान आणि प्रत्यारोपण याबाबत अनेकांच्या मनात अजूनही गैरसमज आहेत . अचूक वैद्यकीय माहिती सर्वसामान्यांना समजावी यासाठी माहितीपत्रक , भित्तीचित्रे तसेच माहितीपट यांच्या माध्यमातून जनजागृती करणार असल्याची माहिती सुर्वे यांनी दिली .