६ डिसेंबरला इंदू मिलचा ताबा घेऊ - रामदास आठवले

डॉ . बाबासाहेब आंबेडकर यांच्या स्मारकासाठी इंदू मिलची साडेबारा एकर जागा तातडीने देण्याचा निर्णय केंद्र सरकारने घ्यावा , अन्यथा ६ डिसेंबरला इंदू मिलचा ताबा घेतला जाईल , असा इशारा रिपब्लिकन पक्षाचे नेते रामदास आठवले यांनी सोमवारी दिला . इंदू मिलच्या प्रश्नासाठी पक्षाच्या युवक आघाडी तर्फे चैत्यभूमी ते इंदू मिल अशी रॅली काढण्यात आली . 

काँग्रेस अध्यक्षांच्या जावयाच्या उद्योगासाठी दलितांसाठी राखीव ठेवलेली ५०० एकर जमीन दिली जाते, असा आरोप करून , घटनांकारांच्या स्मारकासाठी जमीन देण्यास राज्य आणि केंद्र सरकार टाळाटाळ करीत असल्याचा आरोप आठवले यांनी केला . 

आठवले यांच्यासोबत पक्षाचे युवक आघाडीचे अध्यक्ष पप्पू कागदे , डॉ . विजय मोरे , रमेश गायकवाड , सचिन मोहिते यांच्यासह अनेक कार्यकर्त्यांना पोलिसांनी ताब्यात घेऊन नंतर सोडून दिले. याप्रसंगी अविनाश महातेकर , अर्जुन डांगळे , दयाल बहादुरे , गौतम सोनवणे आदी हजर होते .