कामगार संघटनांची देशव्यापी संपाची हाक

मुंबई : कामगारांच्या ज्वलंत प्रश्नावर देशभरातील 35 संघटनांनी फेब्रुवारी महिन्यात 20 आणि 21 रोजी संपाची हाक दिली आहे.मध्य रेल्वेच्या वेल्फेअर सभागृहात कामगार संघटनांच्या पार पडलेल्या बैठकीत संप यशस्वी होण्यासाठी चर्चा करण्यात आली.भाववाढ, बेरोजगारी, सार्वजनिक क्षेत्रातील कंपन्यांचे खाजगीकरण, असंघटित कामगारांसाठी सामाजिक सुरक्षा, सर्व कामगारांना पेन्शन यासहित राष्ट्रीय पातळीवरील 10 मागण्या आणि जीवनावश्यक वस्तूंचा पुरवठा रेशनिंग व्यवस्थेमार्फत करा, अत्यावशक सेवा कायदा रद्द करा, या मागण्यांसाठी संप पुकारण्यात येणार आहे. संपाच्या अगोदर सरकारला जागे करण्यासाठी 18 आणि 19 डिसेंबर रोजी सत्याग्रह, जेल भरो आंदोलन करण्यात येणार असल्याचे कामगार संघटना कृती समितीच्या मुंबई विभागाचे संयुक्त निमंत्रक ए. डी. गोलंदाज यांनी प्रसिद्धीपत्रकाद्वारे कळवले आहे. बीएमएच, एचएमएस, भारतीय कामगार संघटना, एनटीआय, इंटक, आयटक, सीटू, राज्य सरकारी कर्मचारी संघटना, नॅशनल रेल्वे मजदूर युनियन आणि इतर कामगार संघटनेचे नेते आणि पदाधिकारी उपस्थित होते.