सीडब्ल्यूसी कंत्राटदारांना काळय़ा यादीत टाकणार - आयुक्त

मुंबई : पालिका वॉर्ड लेव्हलवरील कामे करण्यासाठी सीडब्ल्यूसी कंत्राटदार नेमून त्यांच्याद्वारे ही स्थापत्य कामे केली जातात. हे कंत्राटदार निविदा भरताना अत्यंत कमी किमतीच्या निविदा भरून कामे मिळवतात, मात्र त्या दरात नंतर कामे करण्यास या कंत्राटदारांकडून अनुकूलता दाखवली जात नाही. या कंत्राटदारांनी तीन दिवसांत कामे सुरू न केल्यास त्यांना काळय़ा यादीत टाकण्यात येईल, असे पालिका आयुक्त सीताराम कुंटे यांनी सांगितले. निविदा मंजूर झाल्यानंतर या कंत्राटदारांकडून योग्य कागदपत्रेही वेळेवर आणून दिली जात नव्हती. त्यामुळे प्रत्यक्षात कामास उशीर होत असे. त्यामुळे या कंत्राटदारांना कागदपत्रे सादर करण्यास तीन दिवसांची मुदतवाढ देण्याचा निर्णय घेतला असल्याचे आयुक्तांनी सांगितले. तसे परिपत्रकही काढण्यात आले असून काही कंत्राटदारांकडून कागदपत्रे सादर झाल्यामुळे काही ठिकाणी कामेही सुरू झाल्याचे आयुक्तांनी स्पष्ट केले. आतापर्यंत पालिकेने 300 कामांचे टेंडर काढले असून यामध्ये 125 कामांचे कंत्राट दिले गेले आहे, असेही त्यांनी स्पष्ट केले. दरम्यान, पालिकेची पाच लाखांपर्यंतची कामे बेरोजगार अभियंत्यांना देण्याचा निर्णय झाला असून त्यांना अनुभवाची अट अडवणार नाही. बेरोजगार अभियंते एकूण 15 लाखांची तीन कामे करू शकतील. त्यांनी दर्जात्मक कामे केली तर त्यांना पालिकेकडून नियतितपणे अधिक कामेही दिली जातील, असे आयुक्तांनी सांगितले.