अस्मिता भवनात पालिका शिक्षकांसाठी प्रशिक्षण केंद्र!

मुंबई : बृहन्मुंबई महानगरपालिका शिक्षक सभा आणि सेंटर फॉर द पब्लिक एज्युकेशन यांच्या संयुक्त विद्यमाने लोणावळ्याजवळील मळवलीत उभारलेल्या सुसज्ज अशा अस्मिता भवनात पालिका शिक्षकांसाठी सुरू होणार्‍या प्रशिक्षण केंद्राचे उद्घाटन नुकतेच शिक्षक सभेचे सरचिटणीस रमेश जोशी यांच्या हस्ते करण्यात आले.

मुंबईतील धावपळ आणि धकाधकीच्या जीवनापासून काहीसे दूर जात विरंगुळा आणि आनंदाचे चार क्षण व्यतीत करतानाच शिक्षणात येऊ घातलेले नवनवीन प्रवाह, शिक्षणातील बदल, कायदे, त्याबाबत शिक्षण मंडळाची भूमिका, शिक्षकांसमोर उभी ठाकलेली आव्हाने, अशा विविध विषयांवर पालिका सर्व भाषिक शिक्षकांना या अस्मिता भवनातील प्रशिक्षण केंद्रात प्रशिक्षण दिले जाणार आहे. शिक्षकांतील आत्मविश्वास अधिकाधिक वृद्धिंगत करू न त्यांच्यात स्फूलिंग फुलविण्याचे काम या केंद्रातून पार पाडले जाईल, असा विश्वास रमेश जोशी यांनी व्यक्त केला.