कैद्यांना तुरुंगात फोन सुविधा

अडीअडचणीच्या प्रसंगी तुरुंगातील कैद्यांना फोनवर बोलण्याची सुविधा उपलब्ध करून देण्याचा निर्णय राज्य सरकारने घेतला असून, सध्या ठाणे व तळोजा तुरुंगात हा निर्णय प्रायोगिक तत्वावर अंमलात येत आहे. तो यशस्वी झाल्यास राज्यातील सर्व तुरुंगांत ही सुविधा उपलब्ध करून देण्यात येईल, अशी माहिती सरकारी वकीलांनी हायकोर्टाला दिली.
ठाणे तुरुंगात शिक्षा भोगणारा अफ्तान सय्यद अहमद शेख आणि नाशिक तुरुंगात सजा भोगणारा जावेद अहमद अब्दुल मजीद या दोन कैद्यांनी हायकोर्टातील न्यायाधीशांना पत्र लिहून, कैद्यांना टेलिफोन सेवा पुरवण्याची विनंती केली होती. नियमानुसार आठवड्यातून एकदा नातेवाईकांना भेटण्याची कैद्यांना परवानगी आहे. मात्र अनेक कैद्यांचे नातेवाईक दूर राहत असल्यामुळे दर आठवड्याला प्रत्यक्ष येऊन भेटणे अशक्य होते. त्यामुळे फोनवर नातेवाईकांशी बोलण्याची सुविधा दिल्यास अडीअडचणी प्रसंगी किंवा एखादा नातेवाईक आजारी असताना फोनवर बोलून त्यांचे सांत्वन करणे शक्य होईल, असे या पत्रात म्हटले होते. कर्नाटक, प. बंगाल आणि दिल्लीत कैद्यांना उपलब्ध असलेली ही सेवा महाराष्ट्रातही सुरू करावी, अशी विनंती या दोन कैद्यांनी केली होती. हायकोर्टाने या पत्राचे जनहित याचिकेत रूपांतर करून राज्य सरकारचे मत मागवले होते. सरकारी वकील अॅड. अरुणा पै यांनी ठाणे आणि तळोजा तुरुंगातील प्रायोगिक तत्वावर देण्यात येणाऱ्या या सुविधेच्या यशावर राज्यभरात ही सेवा देण्याचा निर्णय अवलंबून असेल, असे सांगितले. न्या. नरेश पाटील यांनी याप्रकरणी सुनावणी २५ ऑगस्टपर्यंत तहकूब केली आहे.