अल्पवयीन मुलींचे गर्भपात वाढले

मुंबईत गेल्या वर्षभरात किमान तीस हजार महिलांनी गर्भपात केला. पण यातील धक्कादाय माहिती अशी की यापैकी १०० पेक्षा जास्त गर्भपात हे १५ वर्षापेक्षा कमी वयाच्या मुलींची होती. अशा मुली ज्या शालांत परीक्षेची तयारी करत होत्या. तर ९०० पेक्षा जास्त गर्भपात हे १६ ते १९ वर्षाच्या मुलींची होती. माहिती अधिकारातून हे वास्तव समोर आलं आहे. 
अल्पवयीन मुलींची गर्भपाताची संख्या वाढण्याची तीन प्रमुख कारणं सांगण्यात आली. पहिलं म्हणजे अल्पवयीन मुलींमध्ये असलेला लैंगिक शिक्षणाचा अभाव, दुसरं कारण लैंगिक छळ आणि तिसरं बालविवाह. 'कुमारवयात लग्न होऊन लैंगिक छळामुळे किंवा लैंगिक शिक्षणाच्या अभावामुळे अल्पवयीन मुली गर्भवती होण्याची शक्यताच यात जास्त आहे', असं सेहत या स्वयंसेवी संस्थेच्या संगीता रेगे यांनी सांगितलं. महाराष्ट्रात अजूनही १८ टक्के मुलींची लग्न ही कायद्यानुसार १८ वर्ष पूर्ण होण्या आधीच होत असल्याचं २०१३ च्या आकडेवारीतून समोर आलंय. 

'अल्पवयीन वयात मुलींचा विवाह झाल्याने त्यांच्या गर्भपाताची समस्य नवीन नाही. पण अल्पवयीन मुलींचे साध्य वाढत असलेले गर्भपाताचे प्रमाण पाहता हे लैंगिक छळ किंवा अनैतिक संबंधाचा परिणाम आहे', असं एका सार्वजनिक रुग्णालयातील डॉक्टरांनी सांगितलं. आरटीआय कार्यकर्ते चेतन कोठारी यांनी मुंबई महापालिकेकडून यासंबधी माहिती मागितली होती. '१५ वर्ष किंवा त्यापेक्षा कमी वयातील मुलींचे वाढते गर्भपात ही धक्कादायक माहिती आहे', असं कोठरी यांनी सांगितलं. अवेळी केलेल्या गर्भपातामुळे देशात दरतासाला एका महिलेचा मृत्यू होतो, असा अंदाज वर्तवण्यात येतोय.