कर बुडवून जमवलेली संपत्ती स्वित्झर्लंडमधील बँकांमध्ये ठेवल्याचा संशय असलेल्या भारतीय व्यक्तींची कोणतीही यादी स्वित्झर्लंडने तयार केली नसून याबाबतचा कोणताही तपशील भारत सरकारला सादर करण्यात आलेला नसल्याचे स्विस सरकारने स्पष्ट केले आहे. परिणामी, परदेशी बँकांमध्ये जमा असलेला काळा पैसा भारतात परत आणण्यासाठी उत्सूक असेलल्या मोदी सरकारला या बातमीने मोठा झटका बसला आहे.
स्विस बँकांमध्ये ठेवल्याचा संशय असलेल्या भारतीय व्यक्तींची यादी स्वित्झर्लंडने तयार केली असल्याचे वृत्त दोन दिवसांपूर्वी आले होते. मात्र स्वित्झर्लंडच्या अर्थमंत्रालयाने या वृत्ताचा इन्कार केलाय. यावर्षी फेब्रुवारीनंतर या मुद्दावर कोणत्याही प्रकारची चर्चा झाली नसल्याचे या मंत्रालयातील सूत्रांनी सांगितले.
फेब्रुवारी २०१४ मध्ये स्विसत्झर्लंडच्या एका शिष्टमंडळाने भारतीय अधिकाऱ्यांसोबत चर्चा केली होती. त्यानंतर कोणतीही बैठक अथवा चर्चा झाली नसल्याचे स्विस अर्थमंत्रालयाचे म्हणणे आहे. भारत सरकार राष्ट्रीय आणि आंतरराष्ट्रीय कायद्याच्या चौकटीत याविषयावर पावलं उचलेल अशी आशा स्वित्झर्लंडने व्यक्त केली आहे. काळ्या पैशाबद्दल स्वित्झर्लंडकडून कोणत्याही प्रकारचे उत्तर आले नसल्याचे अर्थमंत्री अरुण जेटली यांनी स्पष्ट केलं आहे.
