लाड-पागे समितीच्या शिफारसी स्वीकारण्याचा निर्णय

मुंबई : सफाई कामगारांबाबत स्थापन केलेल्या लाड-पागे समितीच्या शिफारसी स्वीकारण्याचा निर्णय राज्य शासनाने घेतला आहे. आरोग्य विभागासाठी असलेल्या या शिफारसींची अंमलबजावणी इतर सर्व विभागांमध्ये करण्याचा निर्णय मुख्यमंत्री देवेंद्र फडणवीस यांनी घेतला असल्याचे सूत्रांनी सांगितले.  या समितीच्या अहवालानुसार, सफाई कामगारांच्या भरतीत त्यांच्या वारसांना प्राधान्य देण्यात येणार आहे. या प्रकरणी उच्च न्यायालयात काही याचिकांमध्ये स्थगिती देण्यात आली असल्याने त्या प्रकरणात अपीलात जाण्याचे राज्य सरकारने ठरविले आहे. यापूर्वी वैद्यकीय शिक्षण तसेच सार्वजनिक आरोग्य विभागात लाड-पागे समितीच्या शिफारसींची अंमलबजावणी करण्यात आली नव्हती. परिणामी शासकीय रुग्णालयातील सफाई कामगारांना अनेक प्रश्नांना तोंड द्यावे लागत होते. याची दखल घेऊन ज्या ठिकाणी सफाई कामगारांची पदे आहेत, अशा सर्व विभागांना या शिफारसी लागू करण्यात याव्यात, असे स्पष्ट निर्देश मुख्यमंत्र्यांनी मंगळवारी दिले आहेत. या समितीच्या शिफारसींप्रमाणे सफाई कामगारांच्याच वारसांना सेवाभरतीत प्राधान्य देण्यात यावे, अशी त्यात स्पष्ट तरतूद आहे. ही पदे भरून झाल्यानंतर जागा रिक्त राहणार असतील, तर ती अन्य उमेदवारांतून भरण्यात येतील, असेही या समितीने आपल्या शिफारसींमध्ये सुचवले आहे. याबाबत न्यायालयात प्रलंबित असलेल्या प्रकरणांमध्ये अपील करण्यासंदर्भात विधी व न्याय विभागाने तत्काळ पुढाकार घ्यावा, असेही निर्देश मुख्यमंत्र्यांनी दिले.