मुंबई / प्रतिनिधी
अतिरिक्त महापालिका आयुक्त (शहर) पल्लवी दराडे यांच्या निर्देशांनुसार, उपायुक्त बापु पवार यांच्या मार्गदर्शनाखाली बृहन्मुंबई महानगरपालिका क्षेत्रातील सर्व प्रशासकीय विभागात अनधिकृत फेरीवाल्यांवर महानगरपालिकेद्वारे नियमित स्वरुपात धडक कारवाई करण्यात येत आहे. या अंतर्गत छत्रपती शिवाजी टर्मिनस आणि चर्चगेट रेल्वे स्थानकाजवळील सबवे व परिसर, दादर, कुर्ला, वांद्रे, घाटकोपर, बोरीवली, अंधेरी, कांजूर मार्ग,विक्रोळी, चर्नी रोड, रे रोड येथील परिसरांमध्ये व प्रामुख्याने रेल्वे स्थानकांच्या परिसरात वारंवार कारवाई करण्यात येत असल्याने सदर परिसर अनधिकृत फेरीवाल्यांपासून मुक्त झाल्याने पादचाऱयांना दिलासा मिळाला आहे. तसेच संपूर्ण महापालिका क्षेत्रामध्ये दिनांक १ जून ते २६ जून २०१५ या कालावधीत एकूण १४,७६४ अनधिकृत फेरीवाल्यांवर कारवाई करण्यात आली आहे.
बृहन्मुंबई महापालिका क्षेत्रातील सर्व परिसरात व विशेषकरुन रेल्वे स्थानक परिसरात विशेष मोहिम सातत्याने राबविण्याचे निर्देश देण्यात आले होते, त्यानुसार महापालिकेच्या सर्व २४ विभागात अनधिकृत फेरीवाल्यांवर नियमित स्वरुपात कारवाई करण्यात येत आहे. या अंतर्गत चर्चेगेट सबवे व चर्चगेट स्थानकालगतच्या १५० मीटर्सच्या परिसरामधील ६३ अनधिकृत फेरीवाले हटविण्यात आले आहेत. तसेच छत्रपती शिवाजी टर्मिनस रेल्वे स्थानकालगतचा १५० मीटर्सचा परिसर व सबवे येथे देखील १२९ फेरीवाल्यांवर निष्कासनाची कारवाई करुन त्यांना हटविण्यात आले आहे. दिनांक १ जून ते २६ जून या कालावधीत 'ए' विभागातील एकूण ११७६ अनधिकृत फेरीवाल्यांवर कारवाई करण्यात आली.
