मनपा शाळेची सुरक्षा भिंत कोसळून मुलगा ठार, ९ जखमी

मुंबई : 29 Sep 2015 गोवंडी, बैंगणवाडी येथील मनपा शाळेची सुरक्षा भिंत कोसळल्याची घटना मंगळवारी दुपारी घडली. या अपघातात दोन मुलांसह १0 जण जखमी झाले. त्यापैकी एका मुलाचा मृत्यू झाला आहे. इतरांना उपचारासाठी रुग्णालयात दाखल करण्यात आले आहे. गोवंडी, बैंगणवाडी, चिखलवाडी येथील शाळा नं. ३ रोड नंबर १३ येथील महानगरपालिकेची जुनी इमारत पाडून त्या ठिकाणी नवीन इमारत बांधण्याचे काम सुरू आहे. मंगळवारी दुपारी सुरक्षा भिंतीलगत खोदकाम सुरू असताना अचानक सुरक्षा भिंत कोसळली. त्या ढिगार्‍याखाली पादचारी, दोन फेरीवाले व तेथे खेळत असलेली दोन लहान मुले गाडली गेली, तर काही जण किरकोळ जखमी झाले. या दुर्घटनेची माहिती शिवाजी नगर पोलीस ठाणे तसेच अग्निशमन दलाला मिळताच घटनास्थळी दाखल होऊन मदतकार्य सुरू केले. यात १0 वर्षीय मुलगा आसम याचा मृत्यू झाला असून माशुक अहमद (२६), १ वर्षीय आलिया प्रवीण, शफाली (३0), कलाम सिद्धिकी (२0), मोहसिन खान (४0), मुफिल खान (२५) हे किरकोळ जखमी झालेत. त्यांना उपचारानंतर घरी पाठवण्यात आले आहे, तर अली हसन (४0) आणि रशीद (१0) या दोघांवर सायन रुग्णालयात उपचार सुरू आहेत. याप्रकरणी शिवाजी नगर पोलिसांनी बांधकाम करणार्‍या ठेकेदाराविरोधात निष्काळजीपणाचा गुन्हा दाखल केला आहे.