इसिसवर बंदी घालावी, शांततेसाठी मुस्लिमांमध्ये जनजागृती करणार - रझा अकादमी

मुंबई - पॅरिसमध्ये गेल्या आठवड्यात इसिसच्या दहशतवाद्यांनी आत्मघाती हल्ला केला. या हल्ल्यात १२९ जणांचा मृत्यू झाला. त्यानंतर इसिस संघटनेवर बंदी आणावी, अशी मागणी सर्वच स्तरातून केली जात आहे. आता रझा आकादमी या मुस्लिम संघटनेनेही जगभरात इसिस दहशतवादी संघटनेवर बंदी घालावी, अशी मागणी केली आहे. तसेच इसिस संघटनेविरोधात मुस्लिम तरुणांमध्ये जनजागृती निर्माण करण्यासाठी रझा अकादमी संघटनाकडून मस्जिद आणि मदरसा येथे विशेष प्रबोधन करण्यात येणार आहे, अशी माहिती संघटनेचे पदाधिकारी मनसुद अली खान यांनी दिली.

पॅरीसमध्ये प्राणघातकी हल्ला करणाऱ्या इसिस संघटनेचा आम्ही निषेध करीत आहोत. पैसा आणि हुकूमशाहीसाठीच ही संघटना काम करत असून त्यांचा इस्लामशी दुरान्वयी संबध नसल्याचे रझा अकादमीचे अध्यक्ष अब्दुल गफर यांनी म्हटले आहे. येथील मुसलमान हा हिंदुस्थानशी इमान राखणारा आहे आणि कायम राहील. पण, दुसऱ्या देशांमध्ये होणाऱ्या हल्ल्यांचा संबध येथील मुसलमान बांधवांशी जोडला जातो ही खंत त्यांनी यावेळी व्यक्त केली. इसिस संघटना स्वत:ला इस्लामिक म्हणवते पण निरापराधांचे प्राण घेणे ही मानवतेची हत्या आहे, अशी इस्लामची शिकवण आहे. त्यामुळे इसिसच्या कारस्थानांमुळे इस्लाम बदनाम होत असल्याचेही त्यांनी सांगितले. यावेळी ऑल इंडिया मस्जिद काऊंसिलचे मुफ्तीम मंजर हसन खान अश्रफी, मौलाना कमर रझा अश्रफी हे उपस्थित होते. मुस्लिम मदरशे, मस्जिद यांमध्ये यासंबधी जनजागृती करणार असून सोशल मीडियाचाही प्रभावी वापर यासाठी केला जाणार असल्याचे रझा अकादमीतर्फे सांगण्यात

 आले.