मुंबई महापालिका एसडब्लूडी विभाग घोटाळा = भाग ६

एसडब्लूडीमधील २३० कोटींच्या घोटाळ्याची आयुक्तांनी चौकशी करावी - जाहिद शेख..
काळ्या यादीतील कंत्राटदार व अधिकाऱ्यांवर कारवाई करा - रवी राजा..
मुंबई / अजेयकुमार जाधव -
मुंबई महानगरपालिकेच्या एसडब्लूडी (पर्जन्य जल वाहिन्या) विभागाकडून सन २०१४ मध्ये १६८ व १८२ या निविदेमधून देण्यात आलेल्या रफी नगर, बैंगणवाडी, बाप हेरिटेज, ज्ञानसाधना हायस्कुल नाल्याच्या बाजूने संरक्षण भिंत बांधणे, नाल्यांचे खोलीकरण, रुंदीकरण करण्याचे कंत्राट २०१४ मध्ये आर. ई. इन्फ्रा.ला देण्यात आले. या कामामध्ये २३० कोटी रुपयांचा घोटाळा झाला असून या प्रकरणात एम पूर्व विभागातील अधिकारी व एसडब्लूडी विभागातील अधिकारी सामील असल्याने पालिका आयुक्त अजोय मेहता यांनी या प्रकरणाची सखोल चौकशी करून दोषी अधिकाऱ्यांवर कारवाई करावी अशी मागणी आरटीआय कार्यकर्ते जाहिद शेख यांनी केली आहे.

जाहिद शेख यांनी आरटीआय मधून मिळवलेल्या कागदपत्रांमधून सदर घोटाळा उघड झाला आहे. आरटीआय मधून मिळालेल्या माहितीमधून आर.ई. इन्फ्रा या कंत्राटदाराने कागदपत्रांची व बँक ग्यारेंटीची पूर्तता केली नसताना अधिकाऱ्यांनी कंत्राट दिले. नाल्यामध्ये झोपड्या उभ्या असताना कंत्राटदाराला सॉईल टेस्टिंग व इतर कामाचा निधी गेले दोन ते तीन वर्षे दिला जात आहे. आर.ई. इन्फ्रा या कंत्राटदाराला मुंबई महानगर पालिकेने रस्ते घोटाळ्यामध्ये काळ्या यादीत टाकले आहे. काळ्या यादीत टाकलेल्या कंत्राटदाराकडून एसडब्लूडी विभाग आजही कामे करून घेत असून कंत्राटदाराला लागेल तितका निधी मंजूर करून देत असल्याने एसडब्लूडी विभाग आर. ई. इन्फ्रा या कंत्राटदारावर मेहरबान का असा प्रश्न जाहिद शेख यांनी उपस्थित केला आहे.

"जेपीएन न्यूज" मधून एसडब्लूडी विभागाचा घोटाळा उघड होऊ लागल्यावर आपले इतर प्रकार उघड होऊ नये म्हणून कंत्राटदार आणि महानगरपालिकेने घाईगडबडीत २० एप्रिल २०१७ ला रफी नगर नाल्यावरील काही झोपड्या तोडून टाकल्या. रफी नगर नाल्यावरील २७४ पैकी ५९ झोपडीधारक पालिकेने पात्र ठरले होते. त्यात वाढ होऊन नंतर ६८ झोपडीधारक पात्र ठरवण्यात आले. झोपड्या पात्र ठरवण्यात एका झोपडी धारकाकडून ५ लाखाची मागणी केली. या झोपडी धारकांना एमएमआरडीएच्या लाईट पाणी नसलेल्या इमारतीमध्ये घरे देण्यात आली आजही हे लोक लाईट पाणी नसलेल्या इमारतीमध्ये राहत असल्याचे जाहिद शेख यांनी सांगितले.

निविदा क्रमांक १६८ व १८२ च्या कामासाठी सॉल्ट डिपार्टमेंट, फॉरेस्ट डिपार्टमेंट, कोस्टल सीआरझेड, महाराष्ट्र प्रदूषण विभाग तसेच मुंबई महापलिककेकडून परवानगी घेण्यात आलेली नाही. कंत्राटदाराने परवानगी न घेता नाल्याचे रुंदीकारण, खोलीकरण तसेच नाला वळवण्याचे काम सुरु ठेवले आहे. या घोटाळ्यामध्ये पालिकेच्या एम पूर्व विभागातील वसाहत अधिकारी, सहाय्यक आयुक्त व एसडब्लूडी विभाग पूर्व उपनगरे तसेच पालिका मुख्यालयापर्यंत अधिकारी गुंतले असल्याने या सर्व अधिकाऱ्यांची सखोल चौकशी करण्याची मागणी जाहिद शेख यांनी केली आहे.

कंत्राटदार व अधिकाऱ्यांवर कारवाई करा -  
मुंबई महानगरपालिकेत एखाद्या कंत्राटदाराला काळ्या यादीत टाकल्यावर त्याला महापालिकेमधून हद्दपार केले पाहिजे. काळ्या यादीत टाकलेल्या कंत्राटदाराकडून काम काढून घेऊन नवे कंत्राट द्यायला हवे होते. या ठिकाणी रस्ते घोटाळ्यात काळ्या यादीत टाकलेल्या कंत्राटदाराकडून एसडब्लूडी विभागातील अधिकारी आजही कामे करून घेत असतील तर यामध्ये अधिकाऱ्यांचे लागेबांधे असल्याचे स्पष्ट होत आहे. रस्ते आणि नाले सफाई घोटाळा अधिकारी आणि कंत्राटदार यांच्या संगनमताने झाल्याचे उघड झाले आहे. यामुळे पालिका आयुक्तांनी या घोटाळ्याची चौकशी करून दोषी अधिकारी व कंत्रादारावर कारवाई करावी..
रवी राजा - विरोधी पक्ष नेते, मुंबई महानगरपालिका