मुंबई - मुंबईची वैशिष्ट्यपूर्ण भौगोलिक परिस्थिती लक्षात घेता अतिवृष्टीच्या काळात महानगरात कोसळणा-या पावसाच्या पाण्याचा निचरा प्रभावीपणे होण्यासाठी महानगरपालिका क्षेत्रात एकूण ६ उदंचन केंद्र (पंपींग स्टेशन) कार्यरत आहेत. या उदंचन केंद्रामध्ये एकूण ४३ पंप असून यापैकी प्रत्येक पंपाची क्षमता प्रति सेकंदाला ६,००० लिटर पाण्याचा उपसा करण्याची आहे. याचाच अर्थ सर्व पंपांची एकत्रित क्षमता ही प्रत्येक सेंकदाला २ लाख ५८ हजार लिटर एवढ्या पाण्याचा उपासा करण्याची आहे. दिनांक १६ ऑगस्ट २०२५ रोजी सकाळपासून बृहन्मुंबई महानगरपालिका क्षेत्रात पावसाला सुरुवात झाली. तेव्हापासून ते दिनांक १९ ऑगस्ट २०२५ रोजी दुपारी १२ वाजेपर्यंतच्या साधारणपणे ४ दिवसांच्या कालावधीत सर्व उदंचन केंद्रामधून तब्बल १६,४५१.५५ दशलक्ष लिटर (१,६४५.१५५ कोटी लिटर) एवढया पाण्याचा उपसा करण्यात आला. तुलनात्मक विचार केल्यास ८,०४.६ कोटी लिटर एवढी जलधारण क्षमता असणा-या तुळशी तलावातील पाण्याच्या दुपटीपेक्षा अधिक पाण्याचा उपसा गेल्या ४ दिवसांत करण्यात आला आहे.
दिनांक १६ ऑगस्ट ते १९ ऑगस्ट २०२५ या साधारपणे ४ दिवसांच्या कालावधी दरम्यान पावसाच्या पाण्याचा सर्वाधिक उपसा हा इर्ला उदंचन केंद्राद्वारे करण्यात आला. या केंद्राद्वारे ३,७६८.४८ दशलक्ष लिटर एवढया पाण्याचा उपसा करण्यात आला. या खालोखाल क्लिव्हलॅंड बंदर उदंचन केंद्रातून २,९०६.०२ दशलक्ष लिटर, गजधरबंध उदंचन केंद्रातून २,८७०.११ दशलक्ष लिटर, लवग्रोव्ह उदंचन केंद्रातून २,८२६.५० दशलक्ष लिटर,हाजी अली उदंचन केंद्रातून २,३७९.७८ दशलक्ष लिटर आणि ब्रिटानिया उदंचन केंद्रातून १७००.६७ दशलक्ष लिटर पाण्याचा उपसा करण्यात आला. यानुसार सर्व ६ उदंचन केंद्राद्वारे १६,४५१.५५ दशलक्ष लिटर पाण्याचा उपसा करण्यात आला. यानुसार पाण्याचा उपसा करण्यासाठी सर्व ६ उदंचन केंद्रामध्ये कार्यरत असलेल्या पंप हे दिनांक १६ ऑगस्ट ते १९ ऑगस्ट २०२५ या ४ दिवसांच्या कालावधी दरम्यान सर्व पंपांचा एकत्रितरित्या विचार केल्यास एकूण ७६१ तास व ३८ मिनिटे कार्यरत होते.
बृहन्मुंबई महापालिका क्षेत्रात पडणा-या पावसाच्या पाण्याचा निचरा होण्यासाठी हाजीअली, लव्हग्रोव्ह (वरळी), क्लीव्हलँड बंदर (वरळी गाव), ब्रिटानिया (रे रोड), ईर्ला (जुहू) आणि गजदरबंध (सांताक्रूज) या प्रत्येक ठिकाणी एक याप्रमाणे ६ उदंचन केंद्रे कार्यरत असून यात एकूण ४३ पंप कार्यरत आहेत. पावसाचे व उदंचन केंद्रांमध्ये वाहून येणा-या पाण्याचे प्रमाण लक्षात घेऊन हे पंप संगणकीय प्रणालीद्वारे कार्यरत होतात.
अ. क्र. उदंचन केंद्राचे नाव/ पंपांची संख्या/ प्रति सेकंद पाणी उपसा करण्याची कमाल क्षमता (लिटर)
१. ईर्ला- ८/ ४८००० / ३,७६८.४८
२. क्लीव्हलँड बंदर- ७/ ४२००० / २,९०६.०२
३. गजदरबंध- ६/ ३६००० / २,८७०.११
४. लव्हग्रोव्ह- १०/ ६०००० / २,८२६.५०
५. हाजी अली- ६/ ३६००० / २,३७९.७८
६. ब्रिटानिया- ६/ ३६००० / १,७००.६
७. एकूण- ४३/ २,५८,०००/ १६,४५१.५५
No comments:
Post a Comment