गॅस सिलिंडरच्या तुटवड्यामुळे शहरात नागरिकांना एजन्सीबाहेर तासनतास रांगा लावाव्या लागत आहेत. या पार्श्वभूमीवर सायबर भामटे बनावट संदेश, लिंक आणि ओटीपीच्या माध्यमातून नागरिकांची आर्थिक फसवणूक करत असल्याचे प्रकार वाढले आहेत. याला आळा घालण्यासाठी चेंबूर पोलिस ठाण्याच्या वतीने झोपडपट्टी भागात ध्वनिक्षेपकाद्वारे जनजागृती मोहीम राबवण्यात येत आहे. नागरिकांनी ओटीपी कोणालाही देऊ नये, अनोळखी लिंकवर क्लिक करू नये आणि केवळ अधिकृत माध्यमांद्वारेच व्यवहार करावेत, असे आवाहन पोलिसांकडून करण्यात येत आहे.
दरम्यान, मालाड परिसरात गॅस सिलेंडरचा काळाबाजार सुरू असल्याची माहिती मिळताच पोलिसांनी छापा टाकून कारवाई केली. या कारवाईत १३ जणांच्या टोळीविरुद्ध गुन्हे दाखल करण्यात आले असून त्यांच्या ताब्यातून सुमारे १२ घरगुती व व्यावसायिक गॅस सिलेंडर जप्त करण्यात आले आहेत. ही टोळी दुप्पट दराने सिलेंडर विकून नागरिकांची लूट करत असल्याचे तपासात उघड झाले आहे.
गॅस तुटवड्यामुळे छोट्या व्यवसायांवरही मोठा परिणाम झाला असून अनेक खाऊगल्ल्या आणि स्टॉल बंद होण्याच्या मार्गावर आहेत. या पार्श्वभूमीवर नागरिकांनी अधिक सतर्क राहण्याचे आणि कोणतीही संशयास्पद बाब आढळल्यास तत्काळ पोलिसांशी संपर्क साधण्याचे आवाहन करण्यात आले आहे.
No comments:
Post a Comment