मुंबई - मुंबईतील मांडवी येथील शासकीय औद्योगिक प्रशिक्षण संस्था (आयटीआय) यांच्या नामांतराच्या प्रस्तावावरून नवा राजकीय वाद निर्माण होण्याची चिन्हे दिसू लागली आहेत. दोन वर्षांपूर्वी या संस्थेला भारतरत्न, माजी राष्ट्रपती आणि प्रख्यात शास्त्रज्ञ डॉ. ए. पी. जे. अब्दुल कलाम यांचे नाव देण्यात आले होते. मात्र आता स्थानिक आमदार अमीन पटेल यांनी हे नाव बदलून "हाजी अब्दुल रहमान शाह बाबा शासकीय आयटीआय" असे करण्याचा प्रस्ताव सादर केल्याने वाद पेटला आहे.
या प्रस्तावावर तीव्र प्रतिक्रिया व्यक्त करत मंत्री मंगलप्रभात लोढा यांनी हा प्रकार डॉ. कलाम यांचे नाव पुसण्याचा प्रयत्न असल्याची टीका केली आहे. त्यांनी सोशल मीडियावरील पोस्टद्वारे या प्रस्तावाचा निषेध नोंदवत सरकार हा प्रस्ताव ठामपणे फेटाळणार असल्याचे स्पष्ट केले.
२०२४ मध्ये राज्य सरकारने मांडवी येथील आयटीआयला डॉ. ए. पी. जे. अब्दुल कलाम यांचे नाव देण्याचा ऐतिहासिक निर्णय घेतला होता. देशाच्या वैज्ञानिक प्रगतीत आणि युवा पिढीला प्रेरणा देण्यात डॉ. कलाम यांचे योगदान अमूल्य असल्याने त्यांच्या नावाने संस्थेचे नामकरण करण्यात आले होते. या निर्णयाचे विविध स्तरांतून स्वागतही झाले होते.
मात्र, आता स्थानिक आमदार अमीन पटेल यांनी संस्थेचे नाव बदलण्याची मागणी करत कौशल्य विकास विभागाकडे प्रस्ताव सादर केला आहे. यावर प्रतिक्रिया देताना मंत्री लोढा म्हणाले की, "भारताचे माजी राष्ट्रपती, महान वैज्ञानिक आणि देशातील कोट्यवधी युवकांचे प्रेरणास्थान असलेल्या डॉ. अब्दुल कलाम यांचे नाव हटवण्याचा प्रयत्न अत्यंत दुर्दैवी आणि निंदनीय आहे. अशा प्रकारच्या प्रस्तावाला सरकारकडून कोणतीही मान्यता दिली जाणार नाही."
दरम्यान, या मुद्द्यावरून आता राजकीय वातावरण तापण्याची शक्यता असून विविध राजकीय पक्ष आणि सामाजिक संघटनांकडूनही प्रतिक्रिया उमटू लागल्या आहेत. डॉ. कलाम यांच्या नावाने सुरू असलेल्या संस्थेचे नामांतर करण्याच्या प्रस्तावावरून येत्या काळात आरोप-प्रत्यारोप अधिक तीव्र होण्याची शक्यता व्यक्त केली जात आहे.
No comments:
Post a Comment