मुंबई JPN NEWS - सणासुदीचा हंगाम सुरू होण्यापूर्वीच साखरेच्या दरात मोठी वाढ झाल्याने सर्वसामान्यांच्या घरगुती बजेटवर अतिरिक्त भार पडण्याची शक्यता आहे. राज्यातील काही बाजारपेठांमध्ये किरकोळ साखरेचा दर ८० रुपये किलोपर्यंत पोहोचल्याचे चित्र आहे. तर घाऊक बाजारात साखरेचा दर सुमारे ७,५०० रुपये प्रति क्विंटलपर्यंत गेल्याची माहिती समोर आली आहे.
काही दिवसांपूर्वी ६५ रुपये किलोच्या आसपास मिळणारी साखर आता अनेक ठिकाणी ७० ते ८० रुपयांच्या दरम्यान विकली जात असल्याने ग्राहकांच्या खिशाला मोठी झळ बसत आहे. विशेषतः सणासुदीच्या काळात मिठाई, फराळ आणि विविध खाद्यपदार्थांसाठी साखरेची मागणी वाढत असल्याने दरवाढीचा परिणाम अधिक जाणवण्याची शक्यता आहे.
साखरेच्या दरवाढीमागे नेमके कारण काय? -
बाजारातील साखरेच्या उपलब्ध साठ्यात झालेली घट हे दरवाढीमागील प्रमुख कारण मानले जात आहे. २०२५-२६ च्या साखर हंगामात देशांतर्गत वापर आणि उत्पादन यातील तफावत, तसेच उपलब्ध साठ्यात झालेली घट यामुळे बाजारातील पुरवठ्यावर परिणाम झाल्याचे जाणकारांचे म्हणणे आहे.
याशिवाय साखरेच्या निर्यातीला देण्यात आलेली परवानगी आणि त्यातून देशांतर्गत बाजारातील उपलब्ध साठ्यावर झालेला परिणाम याकडेही लक्ष वेधले जात आहे. त्यामुळे आगामी काळात बाजारातील पुरवठा आणि मागणी यावर साखरेचे दर अवलंबून राहणार आहेत.
आयातीच्या पर्यायावरही विचार -
देशांतर्गत बाजारातील उपलब्धता वाढवण्यासाठी केंद्र सरकार साखर आयातीच्या पर्यायाचाही विचार करत असल्याचे सांगितले जात आहे. आयातीचा निर्णय झाल्यास बाजारातील साखरेचा पुरवठा वाढून दर स्थिर होण्यास मदत होऊ शकते.
दरम्यान, सणासुदीच्या काळात साखरेच्या दरात झालेली वाढ ग्राहकांसाठी चिंतेचा विषय ठरत आहे. आधीच महागाईचा सामना करणाऱ्या नागरिकांना साखरेच्या वाढत्या दरामुळे घरगुती खर्चाचे नियोजन करताना आणखी तारेवरची कसरत करावी लागण्याची शक्यता आहे.
No comments:
Post a Comment